वीरगञ्ज । वीरगञ्जको चिनी मिलस्थित पशुपति मन्दिरको परिसरमा आज तेस्रो शनिवार पनि सरसफाई गरिएको छ ।
युवा समाज पिपरा, लिंक रोड पिपरा विकास समिति, वीरगञ्ज महानगरपालिकासहितका विभिन्न संघ संस्था, सशस्त्र प्रहरी एवम् स्थानीयको सहयोगमा मन्दिर परिसर सरसफाई गरिएको हो ।
युवा समाज पिपराका अध्यक्ष अनिल पटेल, लिंक रोड पिपरा विकास समितिका अध्यक्ष हरि गौतम, सचिव ऋषि सत्याल, वीरगञ्ज महानगरपालिकाको सरसफाई शाखा प्रमुख सर्फुदिन मियाँ, सशस्त्र प्रहरी १३ नम्बर गणका प्रहरी नायब उपरीक्षक निर्मल थापा, हिन्दु परिषद् नेपाल पर्साका अध्यक्ष हरेन्द्र पटेल लगायतको उपस्थिती रहेको थियो ।
४० जनाभन्दा बढीले मन्दिर वरिपरीको घाँस काट्नुका साथै सरसफाई गरेका थिए । यसअघि पहिलो र दोस्रो शनिवार पनि मन्दिरमा सरसफाई गरिएको थियो ।
साथै आगामी हप्ताको शनिवार पनि सरसफाईलाई निरन्तरता दिने युवा समाज पिपराका अध्यक्ष अनिल पटेलले बताए ।
