वीरगञ्ज । जिल्ला बचत तथा ऋण सहकारी संघ लिमिटेड पर्साको आयोजनामा आज अन्तरक्रिया कार्यक्रम सम्पन्न भएको छ । संघका बरिष्ठ उपाध्यक्ष अलि अखबर अन्सारीको अध्यक्षतामा कार्यक्रम सम्पन्न भएको हो ।

कार्यक्रममा कोभिड १९ का कारण सृजित सहकारी र संघका समस्याहरु, नया कार्यसमितिले गरेका काम कारवाही, आगामी दिनमा सहकारीलाई अँझै चलायमान बनाउन गर्न सकिने योजनाबारेमा संघ र सहकारी संस्थाहरुबिच अन्तरक्रिया भएको हो । अन्तरक्रिया कार्यक्रममा सहकारीकर्मीहरुले राखेका जिज्ञासाहरुको अतिथीहरुले जवाफ दिएका थिए ।

प्रमुख अतिथि नेपाल बचत तथा ऋण सहकारी संघका केन्द्रिय सञ्चालक सदस्य हरेराम प्रसाद पटेलले सबै सहकारीकर्मीहरुको एकताले नै सहकारी र सहकारीकर्मीको विकास हुने बताए । त्यसैगरी सहकारी बोर्डका शम्भु गुप्ताले कोभिड १९ का कारण लामो समयसम्म सहकारीको क्षेत्रमा परेको प्रभावलाई अब न्युनिकरण गर्ने र तेस्रो चरणको कोभिड आएमा सहकारीहरुलाई पनि सहुलियत उपलब्ध गराउनुपर्नेमा जोड दिए ।

कार्यक्रममा राष्ट्रिय सहकारी बैंकका प्रबन्धक सञ्ज्य महतो, नेस्कुनका प्रबन्धक बिजय गुप्ता, सिएमसीका अध्यक्ष चन्देश्वर चौरसिया लगायतले शुभकामना मन्तव्य व्यक्त गरेको संघका प्रबन्धक रामअनुप यादवले जानकारी दिए ।

कार्यक्रमको सहजिकरण जिल्ला बचत तथा ऋण सहकारी संघका महासचिब जिष्णु बरालले गरेका थिए ।