वीरगन्ज । आफूलाई बलात्कार गर्ने एक व्यक्तिलाई मारिदिएकी एक महिलाविरुद्ध हत्या अभियोगमा मुद्दा चलाइएपछि सर्वत्र आक्रोश बढेको छ । यी एकल आमाले एक घरबारविहीन व्यक्तिलाई बास बस्नको लागि ठाउँ दिएकी थियन् तर ती व्यक्तिले उल्टै यी महिलालाई बलात्कार गरेका थिए । मे महिनामा ती बलात्कारीलाई मेक्सिकोको नेजा सहरमा हत्या गरेको आरोपमा २१ वर्षका रोक्साना रुइज सान्टियागोलाई यसअघि नै ३ महिना जेलमा राखिसकिएको छ ।

ती बलात्कारीको पहिचान खुलाइएको छैन । उनले रोक्सानालाई कुटपिट र बलात्कार गरेका थिए तर रोक्सानाविरुद्ध नरसंहारको मुद्दा चलाइएको छ । पुलिसका अनुसार रोक्सानाले ती व्यक्तिलाई अनुहारमा हिर्काएकी थिइन् । यो आक्रमणमा ती युवक घाइते भएपछि रोक्सानाले एउटा टिसर्ट उनको घाँघीमा बेरेर घाँटी थिचेर मारिदिएकी थिइन् । पुलिसका अनुसार उनले ती बलात्कारीको शवलाई एउटा झोलामा हालेर बेनितो जुआरेज क्षेत्रमा सडकछेउ फ्याँकिदिएकी थिइन् ।

द सनको रिपोर्टअनुसार शव फ्याँक्ने क्रममा उनलाई एक छिमेकीले देखेपछि पुलिस बोलाएका थिए । रोक्सानाले एक सार्वजनिक पत्रमा लेखेकी छिन् ‘मैले डर र आतंक महसुस गरें। म उसले अरु कसैलाई चोट पुर्याओस् भन्ने चाहन्नथें । के गर्ने भन्ने मलाई थाहा थिएन । म स्तब्ध थिएँ । उसले मलाई रिस उठायो, मेरो स्वाभिमानलाई ध्वस्त पार्यो । मैले अपमानित र रित्तो महसुस गरें । मलाई चोट लाग्यो । मलाई थाहा छ म आफ्नो शरीरको रक्षा गरेकोमा, महिलाको रुपमा आफूलाई जोगाएकोमा र मलाई आक्रमण गर्नेलाई सजाय दिएकोमा दोषी ठहरिनेछु ।’

४ वर्षका छोराकी आमा त्यस क्षेत्रमा फुटपाथमा आलु बेचेर जीविका चलाउँथिन् । उनी उक दिन कामबाट घर फर्किंदा ती आक्रमणकारीले उनलाई भेटेका थिए । उनले रोक्सानालाई आफ्नो बस्ने ठाउँ धेरै टाढा भएको र जान नसक्ने भएकोले उनको घरमा बस्न सक्छु कि भनेर सोधेका थिए । उनले आफूलाई घरबारविहीन बताएका थिए र रोक्साना उनलाई बस्न दिन तयार भएकी थिइन् । राती रोक्साना निदाएको बेला उनले बलात्कार गरेपछि रोक्साना बिउँझिएकी थिइन् र त्यसपछि यी दुईबीच संघर्ष भएको थियो ।

महिला अधिकारवाही समूहहरुले रोक्सानालाई हिरासतमा राखिएको कुराको निन्दा गरेका छन् । उनी आफ्नै वकिल राख्न सक्ने अवस्थामा छैनन् । उनका आफन्तहरु ९ घण्टाको सडक यात्रा तय गरेर उनलाई जेलमा भेटन जान सक्ने अवस्थामा पनि छैनन् । अधिकारकर्मीहरुले रोक्साना बलात्कार पीडित भएकोले उनीविरुद्ध यसरी मुद्दा चलाउन नमिल्ने आवाज उठाइरहेका छन् ।