वीरगन्ज ।सरकारले कोरोना भाइरसविरुद्धको खोप लगाउन १ हजार ४३३ केन्द्र थप गरेको छ। स्वास्थ्य तथा जनसंख्या मन्त्रालयका अनुसार खोप अभियान चुस्तदुरुस्त बनाउन केन्द्रहरु थप गरिएको जानकारी दिएको हो।
मन्त्रालयले गत १४ माघदेखि कोरोनाविरुद्धको खोप कोभिशिल्ड लगाएर अभियान सुरु गरेको थियो।
खोप अभियानको सञ्चालनका लागि गत २९ असारमा २ हजार ९८९ केन्द्रहरू थपिएका थिए। हाल १ हजार ४३३ खोप केन्द्र थप गरेर ४ हजार ४२२ पुर्याइएको मन्त्रालयले जनाएको छ।
सरकारले पहिलो चरणमा बागमती, गण्डकी र लुम्बिनी प्रदेशमा खोप अभियान सञ्चालन गरेको थियो। अहिले भने बाँकी चार प्रदेशहरूमा पनि खोप अभियान सुरु गरिएको छ।
