काठमाडौं । उपत्यकामा गत १६ वैशाखबाट जारी निषेधाज्ञा पुनः एक साता थप गरिएको छ । उपत्याकाका तीनै जिल्ला काठमाडौं, भक्तपुर र ललितपुरका प्रमुख जिल्ला अधिकारीको मंगलबार बसेको संयुक्त बैठकले उपत्यकामा जारी निषेधाज्ञा एक साता लम्ब्याउने निर्णय गरेको हो ।

यो निर्णयसँगै काठमाडौंमा आगामी २७ साउसम्म निषेधाज्ञा कायम हुने छ । यसअघिको आदेशअनुसार बुधबारसम्म निषेधाज्ञा कायम गरिएको थियो ।

पछिल्लो समय कोरोना संक्रमण गति बढ्दै गएको निष्कर्षसहित निषेधाज्ञा थप गर्ने निर्णय लिएको काठमाडौंका प्रमुख जिल्ला अधिकारी कालीप्रसाद पराजुलीले जानकारी दिए ।

जिल्ला प्रशासन कार्यालय काठमाडौंद्वारा जारी निषेधाज्ञा आदेशअनुसार सबै प्रकारका सभा, सम्मेलन, पार्टी प्यालेस, सिनेमा हल, रेस्टुरेन्ट, डान्सबार, दोहोरी, नाचघर, क्लब, स्विमिङ पुल, मनोरञ्जनस्थल, संग्रहालय, रंगशालामा हुने दर्शकसहितको खेलकुद र भीडभाड हुने अन्य कार्यक्रम सञ्चालन गर्न÷गराउन रोक लगाइएको छ ।

त्यस्तै, खुला स्थानमा भेला हुन, भीडभाड गर्न, सभा जुलुस, जात्रा, महोत्सव, भोज भतेर आदि गर्न/ गराउन नपाउने यसअघिको व्यवस्थालाई निरन्तरता दिइएको छ ।