कोलम्बो | श्रीलङ्कामा एक करोड व्यक्तिलाई कोभिड-१९ विरूद्धको खोप लगाइएको मङ्गलबार सार्बजनिक यहाँको सरकारी तथ्याङ्कले देखाएको छ।श्रीलङ्कामा यसै बर्षको जनवरीदेखि कोभिड-१९ विरूद्धको खोप कार्यक्रम सञ्चालन भएदेखि कोभिड-१९ खोपको पहिलो मात्रा लगाउनेको सङ्ख्या एक करोडभन्दा माथि पुगेको औषधि उत्पादन, आपूर्ति र नियमन राज्यमन्त्री चन्ना जयसुमानाले बताएका छन्।
जयसुमानाले श्रीलंकामा ३० वर्षभन्दा माथिको कूल जनसङ्ख्या एक करोड १५ लाखमा खोप लगाउन बाँकी रहेको उक्त उमेर समूहका १५ लाख व्यक्तिलाई आगामी केही सातामा नै खोप दिइने बताए।
जयसुमानाले स्थानीय सञ्चारकर्मीसँग भने, ‘श्रीलङ्काका राष्ट्रपतिले अगस्टको अन्त्यअघि ३० वर्षभन्दा माथिका सबैलाई खोप लगाउने प्रबन्ध गर्न सरकारलाई दिएको निर्देशनअनुसार प्रशासनले काम गरिरहेको छ। हामी विश्वस्त छौं हामीसँग तोकिएको समयभन्दा अघि पनि यो अभियानलाई पूरा गर्न लागिपरेका छौँ।’
सरकारी अधिकारीका अनुसार श्रीलङ्काले खोप लगाउने कामलाई पहिलो प्राथमिकतामा राखी अभियानलाई तीव्रता दिएको छ।३० वर्षभन्दा माथिको उमेरका व्यक्तिलाई खोप लगाइसकेपछि सरकारले छिट्टै १८-३० वर्ष उमेर समूहलाई लक्षित गरी अभियान थाल्नेछ।स्वास्थ्य मन्त्रालयको तथ्याङ्कअनुसार श्रीलङ्कामा चीनमा निर्मित खोप सिनोफार्म लगाउनेको सङ्ख्या करिब ८३ लाख रहेको छ।
