सप्तरी | सप्तरीमा ओभरटेक गर्ने क्रममा मोटरसाइकल दुर्घटना हुँदा दुई जनाको मृत्यु भएको छ।मृत्यु हुनेमा जिल्लाको शम्भुनाथ नगरपालिका वडा नं. ७ का २८ वर्षीय बुद्ध सागर चौधरी र सिरहाको लहान नगरलालिका वडा नं. १७ का अन्दाजी २८ वर्षीय रामशंकर यादव रहेको जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक माधव प्रसाद काफ्लेले जानकारी दिए।
मृत्यु भएका दुबै जनाको शव लहान अस्पतालमा रहेको प्रवक्ता काफ्लेले बताए।उक्त दुर्घटनामा दुई जना घाइते भएका छन्। सप्तरीको शम्भुनाथ नगरपालिका वडा नं. ७ का स्ने २८ वर्षीय आनन्द चौधरी र सिरहाको लहान नगरपालिका वडा नं. २० का २३ वर्षीय सोनम चौधरी घाइते रहेको प्रवक्ता काफ्लेले बताए। घाइते दुबै जनाको उपचार भैरहेको छ।
सोमबार साँझ ७ बजे सप्तरीको खडक नगरपालिका वडा नं. ४ अमहास्थित पूर्व–पश्चिम राजमार्गमा पश्चिमबाट पूर्वतर्फ जाँदै गरेको बा २ ख ५६८२ नम्बरको बसलाई सोही दिशातर्फ जाँदै गरेको स. ११ प ४०३८ नम्बरको मोटरसाइकलले ओभरटेक गर्ने क्रममा ह्याण्डल बसको बीच भागमा ठोक्किँदा मोटरसाइकल अनियन्त्रित भइ विपरित दिशाबाट आउँदै गरेको प्र न २–०१–००१ प ९५५६ नम्बरको मोटरसाइकलसँग ठोक्किँदा स. ११ प ४०३८ नम्बरको मोटरसाइकलका चालक बुद्ध सागर चौधरीको घटनास्थलमा नै मृत्यु भएको थियो। यस्तै उक्त मोटरसाइकलमा पछाडि सवार आनन्द चौधरीको घाइते भएका छन्।
त्यस्तै प्र न २–०१–००१ प ९५५६ नम्बरको मोटरसाइकल चालक रामशंकर यादवको सप्तऋषी अस्पताल लहान सिरहामा उपचारको क्रममा मृत्यु भएको र पछाडि सवार सोनम चौधरीको उपचार भैरहेको प्रहरीले जनाएको छ। बस चालक प्रहरीको नियन्त्रणमा रहेको जिल्ला प्रहरी कार्यालय सप्तरीले जनाएको छ।
