विराटनगर । कोरोनाविरुद्धको खोप वितरणको अधिकार अधिकांश जिल्लामा स्थानीय तहलाई नै दिइएको छ । तर यही खोपको दुरुपयोग कसरी भइरहेको छ भन्ने घिनलाग्दो दृष्टान्त विराटनगरमा देखिएको छ । खोप किन्ने अधिकार चाहियो भन्ने स्थानीय तहहरुले केन्द्रसंग गरेको बार्गेनिङ पछि खोप लगाउने अधिकार हात पारे । तर धेरै अघिदेखि खोप वितरण प्रक्रियामा देखिएको असमानता, नातावाद र कृपावादसहित कार्यकर्तावादको विषयमा चर्को असन्तुष्टि पोखिदै आएको थियो ।

यसलाई सच्याउन नसक्दा धेरै ठाउँमा दुरुपयोग मात्र भएन खोप वितरणलाई लिएर भएको विवाद सतहमा समेत आयो । तर विराटनगर महानगरपालिकामा भने मेयर भीम पराजुलीले नै रातको समयमा व्यक्तिको घरमा गएर खोप लगाइरहेको अवस्थामा भाग्नु पर्ने अवस्था आएको छ । महानगरवासीको पहिलो जिम्मा र दायित्व उनको नगरवासीको पनि हो । तर हरेक बर्षको छठमा दशदेखि पन्ध्र किलोमिटर सुतेर लडिबुडी गर्दै विराटनगरवासीको उन्नति, प्रगति र सुख, शान्ति एवं समृद्धिको कामना गर्ने मेयर पराजुलीको आडम्बर र ढोङ्ग यसरी छर्लङ्ग बन्यो कि उनी रातको समयमा लगाउन तयार भएको खोप छोडेर भाग्नु पर्ने अवस्था आयो ।

ठूलो संख्याका विराटनगरवासीले खोप पाउन नसकेको गुनासो सिधाकुराको पछिल्लो एपिसोडमा पनि विराटनगरवासी फोनमार्फत राखेका थिए । यही अवस्थाबीच मेयर पराजुलीको यो कर्तुत सार्वजनिक भएपछि अब विराटनगरवासी थप चनाखो बन्नु पर्ने अवस्था आएको छ ।

मेयर पराजुलीको असली हर्कत देखियो

मध्यरातमा कोरोना विरुद्धको खोप बोकेर आफ्ना कार्यकर्ताको घर पुगेका विराटनगर महानगरपालिकाका मेयर भीम पराजुली स्थानीयबाटै लखेटिएका छन् । आफ्ना समर्थक र आसेपासेलाई खोप लगाउँदै गरेको थाहा पाएपछि स्थानीयले मेयर भीम पराजुलीलाई लखेटेका हुन् । मेयर पराजुली बुधबार राति करिब ९ बजे खोपसहित विराटनगर ५ निवासी कांग्रेस बुथ समितिका सभापति बिमलराज भण्डारीको घरमा पुगेको खबर पाएपछि स्थानीयले विरोध गरेका थिए ।

स्थानीयको विरोधपछि हतारहतार मेयर गाडी चढेर भागेको स्थानीयले बताएका छन् । मेयरले भन्सार एजेन्ट प्रवीण जेसीको गाडीमा खोप लगेको स्थानीयको भनाइ छ । स्थानीयले विरोध गर्दासम्म करिब १५ देखि २० जनाले खोप लगाईसकेको स्थानीयले बताए ।

खोप विरतरण पारदर्शी बनाउ भन्दै प्रदर्शन

मेयर पराजुलीको उक्त हर्कतपछि स्थानीयविरोध उत्रिएका छन् । बिहीवार महानगरपालिका कार्यालय अगाडि विरोध प्रदर्शन गर्दै युवाहरुले हाम्रो खोप खोइ, जनता खोपको वेटिङमा, मेयर साब खोपको सेटिङमा, मेयर सापले के दिन्छ, नोट भएकालाई खोप दिन्छ भन्दै नाराबाजी गरेका थिए ।

यस अघि पनि गरेका थिए मेयरले बदमासी

यसअघि पनि मेयर भीम पराजुलीले आफ्नो घरमा विराटनगरका धनाढ्य व्यापारीहरुलाई खोप लगाएको भन्दै स्थानीयले विरोध गरेका थिए ।

खोप दुरुपयोग घटनाको जिल्ला प्रशासन कार्यालय मोरङले छानबिन गर्ने भएको छ । मापदण्ड विपरित र तोकिएको समय बाहिर खोप लगाउन नपाउने भएपनि स्वयं मेयर नै संलग्न भएको घटना बारे छानबिन गर्न प्रशासन तयार भएको छ ।

स्वयं मेयरले देखाएको यो हर्कत पछि अब देशभरको खोप वितरण प्रक्रियाप्रति आम जनताले शंकाको सुविधा पाएका छन् । त्यसैले थप दुरुपयोग हुन नदिने संघीय सरकार सचेत हुन आवश्यक देखिएको छ ।यो समाचार न्यूज २४ बाट साभार गरिएको छ।