वीरगञ्ज । पर्सा प्रहरीले अवैध हतियारसहित ३ जनलाई पक्राउ गरेको छ । विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरी टोलीले वीरगञ्ज महानगरपालिका वडा नम्बर १५ लक्ष्मणवास्थित एक होटलबाट कटुवा पेस्तोलसहित ३ जनालाई शनिवार साँझ साढे ७ बजे पक्राउ गरेको हो ।

प्रदेश नम्बर २ प्रहरी कार्यालय जनकपुरको सूचना संयन्त्रअनुसार सानो हतियार बेचविखन गर्ने उद्देश्यले बसीरहेको अवस्थामा उनीहरुको शरीर तलाशी गर्ने क्रममा वीरगञ्ज महानगरपालिका वडा नम्बर २५ सिर्सिया निवासी २२ वर्षीय अनिल पटेलको साथबाट १ थान कटुवा पेस्तोल फेला परेको पर्साका प्रहरी प्रवक्ता एवम् प्रहरी नायब उपरीक्षक ओमप्रकाश खनालले बताए ।

पटेलसँगै पर्साको पोखरिया नगरपालिका वडा नम्बर २ निवासी २० वर्षीय विक्रान्ता पटेल र वीरगञ्ज महानगरपालिका वडा नम्बर २५ कै २० वर्षीय रक्की पटेललाई पनि प्रदेश २–०३–०१३ प२०९७ र वन टेस्ट सुपर स्पलेन्डर गरी २ वटा मोटरसाइकलसहित प्रहीले नियन्त्रणमा लिएको छ ।

पक्राउ परेका तिनैजनाविरुद्ध हातहतियारसम्बन्धी कसुरमा आवश्यक अनुसन्धान अघि बढाइएको प्रहरी प्रवक्ता खनालले जानकारी दिए ।