वीरगन्ज । भारतसँग खुला सीमाना जोडिएको जिल्ला पर्सा लागुऔषध ओसारपसारको ट्रान्जिट प्वाईन्ट बनेको छ । निषेधाज्ञाको समयमा सार्वजनीक सवारी साधन सञ्चालन नहुँदा लागु औषध गाँजा, चरेसको तस्करीले व्यापकता पाएको छ ।
पर्सा र चितवन जिल्लामा पर्ने पर्सा राष्ट्रिय निकुञ्जको बाटो भएर गाँजा तथा चरेसको ओसारपसाले व्यापकता पाएको हो । मकवानपुर र धादिङ्बाट तस्करहरुले मकवानपुरको मनहरी, लोथर हुँदै जंगलको बाटो भएर पर्सा जिल्लामा गाँजा ल्याएर यहाँबाट भारतमा पठाउने क्रमले अहिले पनि निरन्तरता पाएको छ । पर्सा राष्ट्रिय निकुञ्ज भएर मनहरी, रामभौरीभाठा हुँदै विजयबस्ती, ओडार, गोपीबस्ती र शिकारीबास पु–याएर भारत लैजाने गरेको एक प्रत्यक्षदर्शीले बताए ।
यस्तै मनहरिबाट चितवनको माडी हुँदै चितवन राष्ट्रिय निकुञ्जको बाटो भएर पर्साको ठोरी पु¥याउने र त्यहाँबाट भारत पु–याइने गरेको पाइएको छ । मनहरीबाट रामभौरीमा आउने गाँजा, चरेस पर्साको पटेर्वासुगौली, चारभैया पोस्ट, गढुवालाइन भएर सुवर्णपुर, वसन्तपुर, महादेवपट्टि लैजाने र त्यहाँबाट भारत लैजाने गरेका छन् ।
यसैगरी, चारभैया, सोनवर्षा, गादी, चाफी, रामभौरी, खरहट्टि, रामपुर, धर्मपुर, देकुली, मलाही टोला, उत्तर सुगौली, भतौडा, गदियानी, पटेर्वा, बगडाडोभ, पथलहवाघाट, भलुवाही खोला, निचुटा, देउरिया, अकुवा, देउरवाना, जगरनाथपुरलगायतका स्थानमा पुरयाउने कार्य भइरहेको छ । त्यस्तै, महादेवपोस्ट पर्सा राष्ट्रिय निकुञ्ज भएर मधुवन मथवल,खजुरिया, सखुवनिया, औराहा, मनवा, भटनी, बडेर्वा, हरपुर, बडनिहार, बिरुवागुठी, हरपुर, एकटाङ्गा, पु–याइन्छ ।
भण्डारण हुने थलो :
जङ्गलको बाटो आएको गाँजा पर्सा जिल्लाको देउरिया, पटेर्वा, देकुली, सोनवर्षा, कञ्चनपुर, बैरियामा भण्डारण हुने गरेको छ । करीब १५÷२० जना तस्करले मकवानपुर, धादिङमा उत्पादित गाँजा, चरेस जङ्गलको बाटो भएर भरियामार्फत भित्रायाउने गरेका छन् ।
कुन बाटो भारत पस्छ ?
पर्सा जिल्लाका विभिन्न स्थानमा भण्डारण गरिएका गाँजा, चरेस अमरपट्टि, प्रसौनीभाठा, अलौं, सबैठवा, पकाहामैनपुर, धोरे, मिर्जापुर, टिहुकी, भिस्वा, जानकीटोला, पाँडेपुर, पिडारीगुठी, महादेवपट्टि र आसवारी भएर भारतका विभिन्न स्थानमा पु–याइन्छ ।
गाँजाको मूल्य :
गाँजा उत्पादन हुने मकवानपुर र धादिङमा अहिले पर्साका तस्करहरूले रु ३ हजारदेखि ३५ सयसम्म प्रतिकिलो गाँजा र ४ हजारदेखि ४५ सय रुपैयाँसम्म प्रतिकिलो चरेस खरीद गर्छन् । यही गाँजा, चरेस पर्सा जिल्लामा आइपुगेपछि यसको मूल्य दोब्बर–तेब्बर हुन्छ । पर्सामा अहिले गाँजा प्रतिकिलो रु ७–८ हजार छ भने चरेस रु १४–१६ हजार प्रतिकिलो छ । यही गाँजा, चरेस भारत पु–याउँदा तस्करहरूले प्रतिकिलो रु १८–२० हजार गाँजा र चरेस रु २४–२५ हजार प्रतिकिलो पाउँछन् ।
गाँजा, चरेसको तस्करीमा आम्दानी बढेकाले अहिले धेरैजसो मानिस यसतर्फ आकर्षित भएका छन् । जङ्गलको बाटो ढुवानी गर्नेहरूको सङ्ख्या पनि बढ्दो छ । पछिल्लो समयमा महिला र बालबालिकाहरूको पनि प्रयोग भइरहेको छ ।
