वीरगन्ज । जिल्ला प्रहरी कार्यालय पर्साले लागूऔषध खैरो हेरोइन (ब्राउन सुगर) सहित एक भारतीय नागरिकलाई पक्राउ गरेको छ ।पक्राउ पर्नेमा भारतको बिहार राज्य मोतिहारी जिल्ला रक्सौल थाना हरैया पञ्चायत वडा नम्बर ५ निवासी ३५ वर्षीय मन्टु पण्डित कुम्हाल रहेका छन् ।

प्रहरीले उनलाई नेपाल-भारत सिमा नजिकै अवस्थित एकीकृत जाँच चौकी (आईसीपी) बाट हिडिरहेको अवस्थामा शङ्का लागेपछि रोकेर रितिपूर्वक खानतलासी उनले आफ्नो खल्तीमा लुकाएर राखेको ५ ग्राम १८० मिलिग्राम ब्राउन सुगर बरामद गरिएको जिल्ला प्रहरी कार्यालय पर्साले जनाएको छ ।

पर्सा प्रहरीका प्रवक्ता एवं प्रहरी नायव उपरीक्षक (डिएसपी) ओमप्रकाश खनालका अनुसार कुम्हाललाई प्रहरीले रोकेर चेकजाँच गर्दा उनले लगाएको पाईन्टको दाहिने खल्तीमा लुकाइछिपाई राखिएको लागूऔषध ब्राउन सुगर बरामद गरिएको थियो ।कुम्हाललाई प्रहरीले नियन्त्रणमा राखेर लागूऔषध सम्बन्धी कसूरमा अनुसन्धान अगाडि बढाइएको डिएसपी खनालले बताए ।