वीरगन्ज ।कांग्रेस उपसभापति विमलेन्द्र निधि र महामन्त्री डा. शशांक कोइराला चाक्सीबारी पुगेका छन् । पूर्वमहामन्त्री प्रकाशमान सिंहसँग छलफलका लागि निधि र कोइराला कांग्रेसका संस्थापक नेता स्वर्गीय गणेशमान सिंहको निवास चाक्सीबारी पुगेका हुन् । निधि र कोइरालासँग लञ्चसहितको मिटिङ सुरु भएको सिंहका स्वकीय सचिव युपी लामिछानेले जानकारी दिए ।
निधि कांग्रेसका संस्थापक नेता महेन्द्रनारायण निधिका पुत्र हुन् भने कोइराला बिपी कोइरालाका पुत्र हुन् । संस्थापक नेतात्रयका छोराहरू निधि, कोइराला र सिंहबीच १४औँ महाधिवेशनको संघारमा यो तेस्राे बैठक भएको हो । तीनै नेता कांग्रेसको १४औँ महाधिवेशनमा सभापतिका आकांक्षी हुन् । पार्टीको नेतृत्व पुस्तान्तरणको पक्षमा उभिएका नेतात्रय यसअघि गत सोमबार निधिनिवासमा बसेका थिए भने शुक्रबार कोइरालानिवासमा बसेका थिए ।
समसामयिक राजनीतिसँगै पार्टीको १४औँ महाधिवेशन समयमै सम्पन्न गर्ने र पुस्तान्तरणसहित सक्षम नेतृत्व चयन गर्ने सन्दर्भमा छलफल हुने जनाइएको छ । महाधिवेशनको संघारमा संस्थापक नेताको एकपछि अर्को भेटघाटले कांग्रेस तरंगित छ ।
उपसभापति निधिले भेटका क्रममा नयाँ समीकरण बनाएर एकजना मात्रै उम्मेदवार बन्नेबारे सकारात्मक छलफल भएको बताउँदै आएका छन् । तर, कोइराला र सिंहले भने पौडेल समूहको भेलामा एक–आपसमा सहयोग गर्ने सन्दर्भमा मात्रै छलफल भइरहेको बताएका थिए ।
कांग्रेसको १४औँ महाधिवेशन भदौको १६ देखि १९ गतेसम्म काठमाडौंमा हुँदै छ । महाधिवेशनको मिति नजिकिएपछि कांग्रेसको नेतृत्वका आकांक्षी नेताहरूबीच गर्मागर्मी सुरु भएको छ ।
