वीरगञ्ज । कोरोना भाइरस संक्रमणका बिचमा पनि वीरगञ्ज भन्सार कार्यालयले जेठ महिनामा १२ अर्ब ३६ करोड भन्दा धेरै राजस्व संकलन गरेको छ ।

जेठ महिनाका लागि १९ अर्ब ५७ करोड रुपैयाँ लक्ष्य निर्धारण गरिएकोमा निर्धारित लक्ष्यको ६३ प्रतिशत राजस्व संकलन भएको प्रमुख भन्सार अधिकृत हरिहर पौडेलले जानकारी दिए । गत वर्ष पनि कोरोना कहरकै कारण आयात निर्यात प्रभावित भएको अवस्थामा कार्यालयले मासिक लक्ष्यको जम्मा ४२ प्रतिशत राजस्व संकलन गरेको थियो । आर्थीक वर्ष २०७६/७७ को जेठ महिनामा ७ अर्ब ५ करोड रुपैयाँ मात्र संकलन गरेको थियो ।

वीरगञ्ज भन्सार कार्यालयले जेठको मासिक लक्ष्य पुरा गर्न नसकेपनि आ.व.को पहिलो ११ महिनासम्मको लक्ष्य लगभग भेटेको छ । आ.व. २०७७/७८ को जेठमसान्तसम्म कूल लक्ष्यको ९९ प्रतिशत संकलन गर्दै १ खर्ब ५३ अर्ब ९८ करोड रुपैयाँ संकलन भएको प्रमुख भन्सार अधिकृत पौडेलले बताए ।

पौडेलका अनुसार विभिन्न १० वटा शीर्षकमध्ये स्वास्थ्य जोखिम कर, पूर्वाधार कर र कृषि सुधार शुल्क बाहेक अन्य सबै शीर्षकमा ११ महिनाको लक्ष्य पुरा हुन नसकेपनि भन्सार राजश्व असुलीको लक्ष्य ९७ प्रतिशत पुरा गरेको छ । जेठसम्ममा ६० अर्ब १२ करोड रुपैयाँ संकलनको लक्ष्य रहेकोमा ५८ अर्ब २८ करोड रुपैयाँ संकलन गरिएको छ ।

चालू आवको ११ महिनाको अवधिमा निर्यात व्यापार ५१ प्रतिशतले वृद्धि भएको छ । भटमासको तेल, सूर्यमूखी तेल, सिन्थेटिक धागो, कपडाको बोरा, प्लाष्टिकको बिर्कोको निकासी ह्वात्तै बढेको कारण निर्यात व्यापारमा उल्लेखनीय सुधार भएको हो । ११ महिनाको अवधिमा ४४ अर्ब २४ करोड २३ लाख रुपैयाँ बराबरको सामान निकासी भएको छ ।

यसैगरी आयातमा २१ प्रतिशतले वृद्धि भएको छ । ४ खर्ब ५८ अर्ब रुपैयाँ बराबरको मालसामान आयात भएको छ । यसमा मुख्यगरी पेट्रोलियम पदार्थ, सवारी साधन, फलाम उद्योगको लागी कच्चा पदार्थ, खजुरको तेल(पाम आयल) र प्लाष्टिक दाना रहेको छ ।