रौतहट | रौतहटको मौलापुर नगरपालिकामा बिहीबार दुई पक्षबीच झडप भएको छ। नगरपालिकाको जारी नगर सभाको क्रममा दुई पक्षबीच झडप भएको हो।नगरसभा जारी रहँदा बाहिर दुई पक्षबीच झडप भएको रौतहटका प्रहरी प्रवक्ता एवं प्रहरी नायब उपरीक्षक भरत श्रेष्ठले जानकारी दिए। रौतहट जिल्लाको मौलापुरमा नगरपालिकामा व्यापक अनियमिता भएको आरोप लगाउँदै स्थानीयले गरे बिरोध प्रदर्शन गरेका छन । पूर्वमन्त्री प्रभु साह र मौलापुर नगरपालिकामा मेयर रहेकी उनकी श्रीमती रीना कुमारी विरुद्ध आज स्थानीयले बिरोध प्रदर्शन गरेका छन् ।
प्रदर्शनमा नेपाली काँग्रेस, माओवादी केन्द्र, एमालेको माधवकुमार नेपाल समूह र जसपाको उपेन्द्र यादव समूहको सहभागिता रहेको छ । मेयर रिनाकुमारी साह र उनका श्रीमान प्रभु साहको बिरोधमा नाराबाजी गर्दे उनीहरूले नगरपरिक्रमा समेत गरेका थिए ।प्रदर्शनकारीले मन्त्री र मेयर बन्न पाईंदैन,अनियमितता बन्द गर, विकासका नाममा लुट्न पाईंदैन लगायतका नारा लगाएका थिए । पूर्वमन्त्री र मेयरको विरुद्ध प्रदर्शनको तयारी भएपछि मौलापुर नगरपालिका कार्यालयमा ठूलो संख्यामा प्रहरी परिचालन गरिएको थियो ।
मौलापुर नगरपालिकाको नगरसभाको विषयलाई लिएर दुई पक्षबीच दोहोरो झडप भएको छ। झडपको क्रममा प्रहरीले एक दर्जन बढी अश्रुग्यास प्रहार गरेको छ। झडपमा एक प्रहरी घाइते भएका छन्। केही प्रदर्शनकारी पनि घाइते भएका छन्। झडप सुरु भएपछि मौलापुर बजार बन्द गरिएको छ।मौलापुर नगरपालिकाको नगरपरिषद्मा कडा सुरक्षा अपनाइएको छ। प्रमुख जिल्ला अधिकारी इन्द्र देव यादवले मौलापुरको स्थिती खराब भएपछि नियन्त्रणमा लिन सुरक्षाकर्मीले केही थान अश्रुग्यास प्रहार गरेको बताए। स्थानीयले भने प्रभु साहको दबाबमा अश्रुग्यास प्रहार गरेको आरोप लगाएका छन् ।