वीरगन्ज । मंगलबार इन्टरनेटको ठूलो कन्टेन्ट डेलिभरी नेटवर्क एक घण्टामा लागि ठप्प हुँदा कैयौं ठूला अन्तर्राष्ट्रिय मिडिया, कैयौं लोकप्रिय एपहरु, सामाजिक संजालहरु र सरकारी वेबसाइट समेत ठप्प भएका छन् । मंगलबार प्रमुख कन्टेन्ट डेलिभरी नेटवर्क फास्टली एक घण्टाका लागि डाउन भएको थियो । यो अवधि अत्यन्तै ठूलो संख्यामा इन्टरनेट प्रयोगकर्ताले प्रयोग गर्ने सामग्रीहरु ठप्प रहेको सीएनएनले जनाएको छ ।
फास्टलीले अन्तर्राष्ट्रिय मिडियाहरु सीएनएन, न्यूयोर्क टाइम्स, द गार्डियन लगायतका कैयौं प्रतिष्ठित समाचार संस्थाको अनलाइन संस्करण सपोर्ट गर्छ । यसले सामाजिक संजाल एपहरु ट्वीच, पिन्टेरेस्ट, एचबीओ म्याक्स, हुलु, रेडिट, स्पोटिफाइ लगायतका सेवाहरुको लागि पनि कन्टेन्ट डेलीभरीको काम गर्छ । यो इन्टरनेट आउटेजले विश्वकै ठूलो अनलाइन सपिङ प्लेटफर्म अमेजन, टार्गेटसहित बेलायत सरकारको आधिकारिक वेबसाइट जीओभी डट युके पनि प्रभावित भयो ।
क्लाउड सेवा प्रदायक फास्टलीमा भएको आउटेजका कारण यो समस्या भएको थियो । कम्पनीले मंगलबार बिहान आफ्नो आधिकारिक वेबसाइटमा एक सूचना जारी गर्दै आफ्नो सिस्टममा समस्या आएको र त्यसलाई ठिक गरिएको बताएको थियो । साइटहरुका लागि सेवा मंगलबार अमेरिकी समयअनुसार बिहान ७ बजेतिर पुनः सुचारु भएका थिए । फास्टलीले केही प्रयोगकर्ताले केही समयका लागि लोड हुने केही बढी समय पर्खिनुपर्ने हुन सक्ने बताएको छ । यो सेवा आउटेजले अमेरिकी महाद्विपसहित युरोप, एसिया र दक्षिण अफ्रिकाका कैयौं देशहरु प्रभावित भएका छन् ।