वीरगन्ज । प्रदेश २ मा थप २ सय ६० जनामा कोरोना संक्रमण पुष्टि भएको छ। योसँगै संक्रमित हुनेको संख्या ३५ हजार २ सय ३३ पुगेको स्वास्थ्य निर्देशनालय प्रदेश २ का वरिष्ठ चिकित्सक कमलेश प्रसाद यादवले जानकारी दिए।

प्रदेशका विभिन्न प्रयोगशालामा गरिएको परीक्षणमा धनुषामा ९३, सर्लाहीमा ७३, सिरहामा ५८, महोत्तरी १८, सप्तरीमा ८, रौतहटमा ४, बारामा २ र अन्य प्रदेशका ४ जनामा कोरोना संक्रमण पुष्टि भएको स्वास्थ्य निर्देशनालयले जनाएको छ।त्यस्तै पछिल्लो २४ घण्टामा थप ३ सय १६ जना कोरोना संक्रमित निको भएका छन्। योसँगै निको हुनेको संख्या २४ हजार ६ सय ६७ पुगेको छ। मंगलबार रौतहटमा १ सय २१, धनुषामा १ सय ११, सप्तरीमा ६१, सिरहामा १२ र पर्सामा ११ जना कोरोना संक्रमित निको भएका छन्।

कोरोना संक्रमणबाट पछिल्लो २४ घण्टामा प्रदेश २ मा १६ जनाको मृत्यु भएको छ। कोरोनाबाट प्रदेशभर हालसम्म ८ सय ७८ जनाले आफ्नो ज्यान गुमाएका छन्।प्रदेशमा हाल ९ हजार ६ सय ८८ जना कोरोनाका सक्रिय संक्रमित रहेका छन्। संक्रमितहरुमध्ये ३ सय १२ जना विभिन्न अस्पतालहरुमा उपचाररत रहेका छन् भने बाँकी होम आइसोलेशनमा छन्।