वीरगन्ज । प्रदेश २ मा जनता समाजवादी पार्टी(जसपा) नेपाल महन्थ ठाकुर समूहका प्रदेश सांसदहरुको बैठक सुरु भएको छ ।आगामी रणनीति बनाउन जितेन्द्र सोनलले बैठक बोलाएको एक सांसदले बताए । प्रदेशसभामा पूर्वराजपा पक्षमा रहेका २५ जना सांसदमध्ये बैठकमा १५ सहभागी छन् । केही सांसद आउने क्रममा रहेको बताइएको छ ।

समाजवादी पार्टी र राजपा समायोजन हुन नसकेको अवस्थामा सोनलले राजपा संसदीय दलको नेताको हैसियतमा प्रदेशसभामा निर्वाह गर्ने भूमिकाबारे रणनीति बनाउने बैठक बोलाएका हुन् । यसअघि आइतबार जसपा अध्यक्ष उपेन्द्र यादवले संसदीय दलको विधान बहुमतले पारित गर्दै संसदीय दलको नेतामा मुख्यमन्त्री लालबाबु राउतलाई बहुमतले चयन गरेका छन् ।

प्रदेशसभाको छैटौं अधिवेशनको पहिलो बैठक आज बस्दै छ । पहिलो दिनको बैठकमा शुभकामना र सरकारले प्रिबजेट विवरण पेस गर्ने कार्यसूची रहेको प्रदेशसभा सचिवालयका सचिव रञ्जित यादवले बताए ।