वीरगञ्ज । जनता समाजवादी पार्टी नेपाल (जसपा) विवाद केन्द्र हुँदै प्रदेशसम्म आइपुगेको छ । पार्टी अध्यक्षद्वय उपेन्द्र यादव र महन्थ ठाकुरले एकअर्कालाई स्पष्टिकरण सोध्नेदेखि पार्टीबाट निकाल्ने कामसम्म गरिसकेपछि प्रदेश नम्बर २ को सरकारमा हेरफेर सुरु भएको छ ।
जसपा अध्यक्ष उपेन्द्र यादवको निर्देशनमा प्रदेश नम्बर २ का मुख्यमन्त्री लालबाबु राउतले आइतबार आफ्नो मन्त्रीमण्डलबाट तिन राज्यमन्त्रीसहित चार मन्त्रीलाई पदमुक्त गरेका छन् । मुख्यमन्त्री राउतले पार्टीका अर्का अध्यक्ष महन्थ पक्षका चार मन्त्रीलाई पदमुक्त गरेका हुन् ।
राउतले भौतिक पूर्वाधार विकासमन्त्री जितेन्द्र सोनल, राज्यमन्त्री डिम्पल झा, उद्योग पर्यटन वन तथा वातावरण राज्यमन्त्री सुरेश मण्डल र सामाजिक विकास राज्यमन्त्री अभिराम शर्मालाई पदमुक्त गरेका छन् ।महन्थ पक्षका १० जनाले उपेन्द्र यादवलाई एक्लाएर प्रधानमन्त्री केपी शर्मा ओलीको कामचलाउ सरकारमा मन्त्री बनेपछि त्यसको प्रतिशोध साध्न यादवले मुख्यमन्त्री राउतमार्फत महन्थ निकट रहेका ४ जना प्रदेशका मन्त्रीलाई पदमुक्त गरेको बुझिएको छ । यादवले आइतबार मात्रै राउतलाई जसपा प्रदेश नम्बर २ संसदीय दलको नेता चयन गरेका थिए ।
यता यादवले विपक्षी गठबन्धनसँग मिलेर प्रदेश २ मा मन्त्रीमण्डल पुनर्गठनको तयारी सुरु गरिरहेका छन् । यादवले नेपाली काङ्ग्रेस र माओवादी केन्द्रलाई सरकारमा सहभागी गराउने छलफल अगाडी बढाएका छन् । स्रोतका अनुसार आजनै काङ्ग्रेस र माओवादीलाई केही मन्त्रलाय दिने यादवको योजना छ ।सरकारमा सहभागि हुने विषयमा काङ्ग्रेस र माओवादी केन्द्र पनि सकरात्मक देखिन्छ ।अहिले उपेन्द्र यादव, लालबाबु राउतसहितको टोलीले नेपाली काङ्ग्रेससँग सरकारमा सहभागी हुने विषयमा छलफल गरिरहेको छ । सरकारमा सहभागी हुन् काङ्ग्रेसको मागको विषयमा छलफल चलिरहेको प्रदेशसभा सदस्य ओमप्रकाश शर्माले यात्राडेलीलाई जानकारी दिए । काङ्ग्रेसले मुख्यमन्त्री पद माग गरेको शर्माले बताए ।त्यसैगरी माओवादी केन्द्रले पनि सरकारमा सहाभागी हुने विषय बारे छलफल गर्न आज संसदीय दलको बैठक बोलाएको छ ।
