वीरगञ्ज ।वीरगञ्ज महानगरले सरकारसँग एकलाख डोज कोरोना विरुद्धको खोप  माग गरेका हुन् । वीरगञ्ज महानगरपालिकाका नगरप्रमुख विजयकुमार सरावगीले कोरोना भाईरस सङ्क्रमण (कोभिड–१९) विरुद्धको खोप वितरणमा वीरगञ्जलाई प्राथामिकतामा राख्न माग गरेका छन् ।नगरप्रमुख सरावगीले नेपाल सरकारसँग वीरगञ्जका लागि एक लाख डोज खोप उपलब्ध गराउन माग गरेका हुन् ।उनले बुधबार नेपाल सरकारको स्वास्थ्य तथा जनसङ्ख्या मन्त्रलायलाई एउटा पत्र लेख्दै देशको प्रमुख प्रवेशद्वार वीरगञ्ज सङ्क्रमणको उच्च जोखिममा रहेकोले खोप वितरणमा वीरगञ्जलाई प्रथामिकतामा राख्न आग्रह गरेका छन् ।

सरावगीले यसअघि सरकारसँग एक लाख डोज खोप खरिद गर्न अनुमति माग गरेका थिए । तर खोप खरिदको जिम्मेवारी सङ्घीय सरकारलाई मात्रै भएको मन्त्रालयबाट विभिन्न सञ्चार माध्यमहरु मार्फत जानकारी पाएपछि उनले सरकारसँग उपलब्ध खोप वितरणमा वीरगञ्ज क्षेत्रलाई प्रथामिकतामा राख्न आग्रह गरेको बताए । नेपालमा कोरोना सङ्क्रमण प्रभाव विशेष गरी भारतसँगको सीमावर्ती सहरहरुमा बढी देखिएको र वीरगञ्ज देशकै प्रमुख स्थल भन्सार नाका र औद्योगिक तथा व्यापारिक नगरको दृष्टिकोणले पनि बढी जोखिम क्षेत्र भएकोले वीरगञ्जलाई प्राथामिकता उनको धारणा छ ।

स्थल मार्ग भएर नेपालको ७० प्रतिशत आयात निर्यात हुने क्षेत्र भएको र वीरगञ्ज नाका भएर दैनिक हजारौँ सङ्ख्यामा मालवाहक सवारी साधन देशका विभिन्न स्थानमा जाने गरेको तथा ढुवानी सेवाका सवारी साधनहरु पनि दैनिक हजारौँ सङ्ख्यामा आवत जावत हुने भएकोले यहाँका नागरिकलाई जोगाउन खोप वितरणको पहिलो प्राथामिकतामा वीरगञ्ज पर्नुपर्ने सरावगी बताउँछन् ।

वीरगञ्ज पथलैया औद्योगिक करिडोरमा सयौँ उद्योग प्रतिष्ठानहरु सञ्चालनमा र त्यहाँ काम गर्ने श्रमिक, ढुवानी सेवामा संलग्न चालक, सहचालक, भन्सारमा कार्यरत कर्मचारीसहित र सेवा प्रदायक संस्थाका प्रतिनिधिलाई पहिलो प्रथामिकतामा राखेर खोप लगाउनु पर्ने देखिएकोले यसलाई गम्भीर रुपमा लिन पनि सरावगीले पत्र मार्फत अनुरोध गरेका छन् ।