वीरगन्ज । कोरोना भाइरस संक्रमण दर उच्च भएपछि राजधानी काठमाडौंमा कडाइ भएको निषेधाज्ञा जेठ २० गतेपछि खुकुलो हुने भएको छ ।
सोमवार उपत्यका छिर्ने मुख्य नाकाको अनुगमन गर्न निस्केका जिल्ला प्रशासन कार्यालय काठमाडौंका प्रमुख जिल्ला अधिकारी (सीडीओ) कालीप्रसाद पराजुलीले कोरोनाको संक्रमण दर घटेकाले २० गतेपछि खुकुलो बनाइने बताए ।
पछिल्लो समय नागढुंगाबाट अत्यावश्यक र अलपत्र परेका यात्रुलाई पनि उपत्यका छिर्न नदिएको भन्ने गुनासो आएपछि अनुगमनमा निस्केको सीडीओ पराजुलीले बताए ।
‘आज बिहान नागढुंगामा अत्यावश्यक सामान बोकेका सवारी पनि रोकिए भनेपछि अनुगमनमा निस्केको हुँ तर त्यस्तो पाइनँ,’ सीडीओ पराजुलीले भने, ‘हामीले उपत्यकाभित्र बिरामीको उपचारमा खटिएका र अत्यावश्यक सामग्री बोकेका सवारीसाधनलाई प्रवेश गर्न दिएका छौं ।’
उपत्यकाभित्र निषेधाज्ञापछि खाद्यवस्तुको कालोबजारी गर्ने, बढी मूल्य लिने व्यापारीलाई अनुगमन गरेको सीडीओ पराजुलीले बताए ।
उपत्यकामा कोरोना भाइरसको संक्रमण भएर अक्सिजन नपाएका बिरामी र अस्पतालमा अक्सिजनको व्यवस्थापन गरिएकाले उपत्यकामा कोरोनाका बिरामी बेड नपाएर फर्कनुपर्ने अवस्था नरहेको सीडीओ पराजुलीले दाबी गरे ।
नागढुंगामा अनुगमनका लागि सीडीओ पराजुलीसहित महानगरीय प्रहरी परिसर काठमाडौंका प्रमुख एसएसपी अशोक सिंह, महानगरीय ट्राफिक महाशाखाका प्रमुख एसएसपी जनक भट्टराई, सशस्त्र प्रहरी एसपी बीपी भट्ट, नेपाली सेनाका काठमाडौं प्रमुख कर्नेल इन्द्रबहादुर थापा मगर लगायत गएका थिए ।
