बीरगन्ज । तीन दिनदेखि निरन्तर भईरहेको वर्षाले प्रदेश २ को जनजीवन अस्तव्यस्त भएको छ । लकडाउनका कारण पहिलादेखि हाटबजार तथा विभिन्न सरकारी तथा गैर सरकारी संघसंस्था बन्द रहेको भएपनि निरन्तर भईरहेको वर्षाले सर्वसधारण झन सास्ती भोग्न वाध्य भएका छन् ।
बंगालको खाडीमा सुरु भएको च्रक्रवर्ति तुफानको प्रभावको कारण प्रदेश २ सहित नेपालका विभिन्न स्थानमा वर्षा भईरहेको छ । निरन्तरको वर्षाले पर्साको धोबिनी गाउँपालिकाको जनजीवन प्रभावित भएको छ ।
बिहीबारदेखिको निरन्तरको वर्षाले धोबिनी वडा नं ४ को मुख्य सडक नै हिलाम्य हुँदा जनजीवन प्रभावित भएको हो ।वडा नं ४ स्थित लंगडीको मुख्य सडक नै हिलाम्य बनेपछि सर्वसाधारणहरुलाई हिँड्डुल गर्न समस्या परेको छ । स्थानियहरुका अनुसार सडकको दुरावस्थाका कारण घरबाट बाहिर निस्कन समेत मुस्किल परेको हो ।बेमौसमी वर्षाले गाउँघरका सडकहरुमा पानी जमेको छ ।
सहायक बाटोमा पानी जम्दा पर्सा जिल्लाको धोबिनी, छिपहरमाई, पकहामैनपुर गाउँपालिका लगायतका गाउँबासीलाई घर बाहिर निक्लिन मुस्किल भएको छ । कोरोनाका कारण कष्टकर बनेको जनजीवन लगातारको झरि र हावाहुरीले गर्दा थप प्रभावित बनेको छ । बिहीबार रातिदेखि चलेको हावाहुरी संगै वर्षाका कारण जनजीवन प्रभावित बनेको हो । बाटो मर्मतसम्भारका पटक पटक जनप्रतिनिधीहरुलाई ताकेता गर्दा पनि कुनै सुनुवाई नहुँदा हरेक वर्ष वर्षायाममा समस्या हुँदै आएको छ ।
