वीरगन्ज । कोरोनाकालमा भारतमा वायुप्रदूषण घटेको भए पनि पवित्रतम गंगा नदी चाहिँ अत्यन्तै प्रदूषित हुँदै गएको देखिएको छ ।बनारसमा गंगाको रंग परिवर्तन भएर हरियो देखिएको छ । विषाक्त पदार्थका कारण गंगा हरियो भएको बताइएको छ । त्यहाँका ८४ वटा घाटमा पानी हरियो देखिएको छ । वैज्ञानिकहरूका अनुसार, यो आल्गे ब्लूम हो र यो अत्यन्तै विषाक्त हुन्छ ।
अहिले कुनै पनि हालतमा गंगाको पानी नपिउन वैज्ञानिकहरूले चेतावनी दिएका छन् । पिउनु त परको कुरा, अन्य केही काममा पनि यसको उपयोग नगर्न उनीहरूले भनेका छन् । यसको उपयोग गर्दा मस्तिष्क र रगतमा समस्या आउँछ । गंगाको पानीमा साइनोब्याक्टेरिया भेटिएको छ ।
बनारसका मानिस यसबाट चिन्तित छन् । डुंगा चलाउने लवकुश साहनीका अनुसार, यस्तो हरियो रंग सधैं देखिँदैन । वर्षाको बेलामा तलाउहरूको काई गंगामा आएर यस्तो हरियो रंग देखिने हो । तर अहिलेको जस्तो हरियो पहिले नदेखेको उनी बताउँछन् । पानीबाट कडा गन्ध पनि आइरहेको छ ।