वीरगञ्ज । पर्साका एकजना चिकित्सकको कोरोना सङ्क्रमणबाट काठमाडौँमा मृत्यु भएको छ ।जिल्लाको सदरमुकामस्थित वीरगञ्ज हेल्थ केयर अस्पतालमा कार्यरत चिकित्सकको कोरोनाभाइरस सङ्क्रमणका कारण काठमाडौँमा मृत्यु भएको हो ।
सङ्क्रमण पुष्टि भएर काठमाडौँस्थति मेडिसिटी अस्पतालमा उपचाररत वीरगञ्ज महानगरपालिका वडा नम्बर ३ छपकैयाँ निवासी २९ वर्षीय डा. मुराद हुसेनको मृत्यु भएको वीरगञ्ज हेल्थ केयर अस्पतालले जनाएको छ ।
डा. हुसेन एक महिना अगाडी मात्र आफ्नो एमएस अर्थोपेडिकको पढाई सकाई बङ्लादेशबाट फर्केर वीरगञ्ज हेल्थ केयर अस्पतालमा काम गर्दै आएका थिए ।कोरोना सङ्क्रमितहरुको उपचारमा खटेका डा. हुसेनसँगै अस्पतालमा कार्यरत अन्य ५ जना चिकित्सकमा गत बैशाख २१ सङ्क्रमण पुष्टि भएको वीरगञ्ज हेल्थ केयर अस्पतालका सञ्चालक डा. अबुल हैस अन्सारीले बताए ।
डा. अन्सारी अनुसार सुरुमा आफ्नै अस्पतालमा उपचार गराएका डा. हुसेनको स्वास्थ्यमा सुधार नआएपछि जेठ १ गते थप उपचारका लागि काठमाडौँको मेडीसिटिमा भर्ना गरिएको थियो । उनले कोरोना विरुद्धको खोपको एउटा मात्र डोज लगाएका थिए ।
कोरोना सङ्क्रमणले गर्दा उनको दुवै फोक्सोमा गम्भीर किसिमको निमोनिया देखिएको कारण उनलाई श्वासप्रश्वासमा समस्या हुँदै आएको थियो । फोक्सो भएको निमोनियाले नै गर्दा गर्दा उनको मृत्यु भएको डा. अन्सारीले यात्राडेलीलाई बताए ।सङ्क्रमण पुष्टि भएका अन्य चिकित्सकहरुको अहिले हेल्थ केयरमै उपचार चलिरहेको छ ।