बीरगन्ज । पर्सामा निषेधाज्ञाको मौका छोपी अधिक मुल्यमा सामान बेचेको आरोपमा एक जना व्यापारी पक्राउ परेका छन् । बीरगन्ज महानगरपालिका वडा नं १० आदर्शनगरस्थित नगरसभागृह छेउको न्यू पप्पु किराना पसलका सञ्चालक लक्ष्मण पोद्दारलाई प्रहरीले पक्राउ गरेको हो ।
१ सय ५ रुपैँया पर्ने बेकिंग पाउडरलाई ३ सय ८ मा बेचेको पाईएपछि शुक्रबार उनलाई प्रहरीले नियन्त्रणमा लिएको जानकारी गराएको हो । महामारी र निषेधाज्ञाका बिच कालोबजारी गरेको गुनासो प्रहरीमा परेपछि प्रहरीले पोद्दारले सञ्चालन गरेको पसलमा अनुगमन गरेको थियो ।
अनुगमनका क्रममा ५०० ग्रामको बेकिङ पाउडरको बट्टामा उत्पादकले १०५ रुपैयाँ अंकित गरेकोमा त्यसमा पोद्दारले कालो पोतेर ३ सय ८० लेखेको भेटिएपछि उनलाई पक्राउ गरिएको प्रहरी नायव उपरीक्षक ओमप्रकाश खनालले बताए ।पसलबाट १२ पिस बेकिङ पाउडरको डब्बाका साथै पोद्दारलाई नियन्त्रणमा लिएर जिल्ला प्रहरी कार्यालय पर्साको हिरासतमा राखिएको उनले जानकारी दिए ।