वीरगंज । देशलाई लामो समयसम्म अनिर्णयको बन्दी बनाउन नहुने निश्कर्ष साथ प्रधानमन्त्री केपी शर्मा ओलीले प्रतिनिधि सभामा विश्वासको मत नलिइ नयाँ प्रक्रियामा जान खोजेको उनी निकटस्थरुले बताएका छन् । बिहीवार दिउसो बसेको मन्त्रिपरिषद् बैठकमा ओलीले आफ्नो पक्षमा बहुमत नभएको थाहा हुँदा हुँदै विश्वासको मत लिने प्रक्रियामा जानु उचित नहुने धारणा राखेका थिए ।
‘एक हप्ता अगाडि मैले त्यही प्रतिनिधि सभामा विश्वासको मत पाउन सकिन, परिस्थिती नबदलिएको अबस्थामा फेरि विश्वासको मत पाउने सम्भावना नदेखिएकोले किन निरर्थक प्रयास गर्ने’ प्रधानमन्त्रीको भनाइ उद्धत गर्दै एमालेका एक स्थायी कमिटी सदस्यले लोकान्तरसँग भने ।
मन्त्रिपरिषद्को बैठकमा ओलीले विश्वासको मत नलिइ धारा ७६ को उपधारा ५ अनुसार नयाँ प्रक्रिया शुरु गर्न आग्रह गर्ने निश्कर्ष सुनाए । मन्त्रिपरिषद्को सिफारिशमा राष्ट्रपति विद्यादेवी भण्डारीले शुक्रवार साझ सम्मको समय दिएर उपधारा ५ अनुसार सरकार गठनका लागि आग्रह गरेकी छन् ।
‘मैले प्रतिनिधि सभामा बहुमत जुटाउन सक्छु भनेर कसैले दावी गरेर राष्ट्रपतिकोमा गयो भने र राष्ट्रपतिलाई विश्वास जुटाउन लाग्यो भने उहाँले नयाँ प्रधानमन्त्री नियुक्त गर्नु होला’ प्रतिनिधि सभाका सदस्य समेत रहेका ती नेताले लोकान्तरसँग भने ।
‘त्यसरी राष्ट्रपतिले कसैलाई प्रधानमन्त्री नियुक्त गरेर उसले संसदमा विश्वासको मत प्राप्त गर्यो भने अब ढुक्कैले १८ महिना सरकार चलाउँछ, भएन भने मुलक निर्वाचनमा जान्छ’ प्रधानमन्त्री ओली निकट ती नेताले भने ।
मन्त्रिपरिषद्ले संविधानको धारा ७६ को ५ अनुसार सरकार गठनका लागि राष्ट्रपतिलाई सिफारिश गर्ने निर्णय गरेको केहीबेरमा नयाँ सत्ता समीकरणका लागि निर्णायक मानिएका जसपाका अध्यक्ष महन्थ ठाकुर र राजेन्द्र महतो ओलीलाई भेटन बालुवाटार पुगेका थिए ।
यसअघि संविधानको धारा ७६ को २ अनुसार बहुमतको सरकार गठनको गृहकार्य गरेर सफल नभएका नेपाली कांग्रेस र माओवादी केन्द्रले अहिले सम्म नयाँ सरकार गठनको प्रक्रियाको विषयमा केही बोलेका छैनन् ।
भोलि राति सम्म कसैले प्रधानमन्त्रीमा दावी नगरेमा यही सरकार चुनावी सरकारका परिणत हुने र प्रतिनिधि सभा विघटनको दिशामा जाने आकलन गरिएको छ ।