वीरगंज । वैशाख शुक्लपक्षको नवमी तिथि अर्थात् हिन्दु धर्मावलम्बीले देवीको अवतारका रुपमा लिने जानकी (सीता) को जन्मदिन । जनकपुरधाम लगायतमा धुमधामका साथ मनाइने जानकी नवमी पर्व यस वर्ष भने कोरोना संक्रमणका कारण प्रभावित भएको छ ।पछिल्लो वर्षसमेत कोरोना संक्रमणकै कारण राम्ररी मनाउन नसकिएको जानकी नवमी पर्व यस वर्ष पनि कोरोनाभाइरसकै कारण प्रभावित भएको हो । जानकी नवमीका दिन भक्तजनहरुको घुइँचो लाग्ने जानकी मन्दिर अहिले सुनसान छ ।

जानकी नवमीको दिन अहिले जानकी मन्दिरको मुल प्रवेशद्वार नै बन्द छ । फाट्टफुट्ट एकदुईजना मन्दिर दर्शनका लागि आउने गरे पनि जानकी नवमी पर्व खल्लो लागेको बताएका छन् ।स्थानीय रिमा यादवले कोरोना संक्रमणका कारण जानकी मन्दिर दर्शन गर्न बिहानै आए पनि यस वर्ष कुनै किसिमको कार्यक्रम नहुँदा खल्लो लागेको बताइन् ।जानकी मन्दिरका पुजारी रामरोशन दासले श्रद्धालु भक्तजनलाई घरबाटै पूजा आराधना गर्न भनिएको बताए ।

‘कोरोनाको संक्रमण रोकथान तथा नियन्त्रणका लागि लगाइएको निषेधाज्ञा, भौतिक दूरी पालन गर्नुपर्ने बाध्यताका कारण यस वर्ष श्रद्धालु भक्तजनलाई घरबाटै पूजाअर्चना गरि मनाउन आग्रह गरेका छौं,’ पुजारी रामरोशन दासले भने । उनका अनुसार आ–आफ्नो घरमा साँझ ७ बजे आरतीका साथै दियो बालेर दिपावली मनाउन आग्रह गरिएको छ ।

मिथिलाका नरेश राजर्षि जनकको पुत्रीको रुपमा वैशाख शुक्ल नवमीकै दिन जानकीको जन्म भएको ग्रन्थहरुमा उल्लेख भएअनुसार आजको दिनलाई जानकी जन्मोत्सवको रुपमा मनाउने गरिन्छ ।जानकी मन्दिरमा जानकी जन्मोत्सव धुमधामसाथ मनाउने गरिन्थ्यो । अन्य वर्ष जानकी नवमीको अवसरमा जानकी मन्दिरमा विशेष पूजा अर्चना तथा नाचगान हुन्थ्यो । जन्मको गीत ‘सोहर’ गाएर भक्तजनहरुले जानकी जन्मजयन्ती मनाउने गर्दथे ।

जानकी नवमीको अवसरमा मन्दिरमा हुने शोभायात्रा, गीत संगीत, नाचगान सबै कार्यक्रम कोरोना महामारीकै कारण स्थगित गरिएको छ । आज साँझ जानकी मन्दिरमा मिथिला परम्परा अनुसार विधिपूर्वक जानकी जन्ममहोत्सव तथा पूजा गरिनेछ ।

यसवर्ष जनकपुरधामको प्रसिद्ध धार्मिक स्थलमध्ये एक रहेको बिहारकुण्ड समेत सुनसान देखिएको छ । बिहारकुण्ड जानकीको बाल्यावस्थामा आफ्नो साथीसँग खेल्ने स्थल रहेको धार्मिक मान्यता छ ।

बिहारकुण्डमा अन्य वर्ष भक्तजनहरुको भिड लाग्ने र भव्यताका साथ जानकी नवमी पर्व मनाउने गरिए पनि यस पटक कोरोना महामारीका कारण निर्धारित कार्यक्रमहरु समेत स्थगित गरिएको सिया रघुवर कुञ्जका महन्थ रामकिशोर दासले बताए ।

बिहारकुण्डमा जम्मा ११ वटा मन्दिर छन् । सबै मन्दिरमा जानकी जन्मको अवसरमा विशेष कार्यक्रम हुँदै आएको थियो । तर ती सबै मन्दिर यस पटक कोरोना महामारीका कारण बन्द छन् ।