वीरगञ्ज। वीरगञ्जमा बुधवार ५ जना कोरोना संक्रमितको मृत्यु भएको छ । जसमध्ये पर्साका ३ जना, बाराका १ र रौतहटका १ जना रहेका छन् ।
पर्साको जिराभवनी गाउँपालिका वडा नम्बर १ निवासी ४२ वर्षीय महिलाको वीरगञ्जस्थित तराई हस्पिटलमा मृत्यु भएको छ । जेठ २ गते संक्रमण पुष्टि भएर सोही दिन अस्पताल भर्ना भएकी महिलाको बुधवार बिहान १ बजेर १० मिनेटमा मृत्यु भएको जिल्ला प्रशासन कार्यालय पर्साका प्रशासकिय अधिकृत विनयकुमार श्रीवास्तवले जानकारी दिए ।

त्यसैगरी वीरगञ्ज महानगरपालिका वडा नम्बर १६ नगवास्थित बाबा होटलमा नेशनल मेडिकल कलेजले सञ्चालन गरेको अस्थाई कोभिड अस्पतालमा पनि एकजना महिलाको मृत्यु भएको छ । बैशाख २३ गते संक्रमण पुष्टि भएर सोही दिन अस्पताल भर्ना भएकी वीरगञ्ज महानगरपालिका वडा नम्बर २ निवासी ५८ वर्षीय महिलाको बुधवार मध्यान्ह १२ बजेर १० मिनेटमा मृत्यु भएको श्रीवास्तवले बताए ।

त्यस्तै रौतहटको गौर नगरपालिका वडा नम्बर ८ निवासी १ महिलाको पनि बुधवार नै ज्यान गएको छ । वीरगञ्जको नारायणी अस्पतालमा संक्रमण पुष्टि भएर बैशाख ३० गते भर्ना भएकी ५१ वर्षीय महिलाको बुधवार दिउँसो १ बजेर १० मिनेटमा मृतयु भएको नारायणी अस्पतालका कोभिड संयोजक डा. सरोजरोशन दासले जानाकरी दिए ।

त्यस्तै कालिकामाई गाउँपालिका वडा नम्बर ४ परशुरामपुर निवासी ४९ वर्षीय पुरुषको पनि नारायणी अस्पतालमा उपचारको क्रममा आज साँझ ७ ज्यान गएको छ । बैशाख २४ गते सङ्क्रमण पुष्टि भएका उनलाई स्वास्थ्यमा सुधार नआएपछि २८ गते अस्पताल भर्ना गरिएको डा. दासले बताए ।

त्यसैगरी बारा जिल्लाको जितपुरसिमरा उपमहानगरपालिका वडा नम्बर १३ डुमरवाना निवासी ३० वर्षीय महिलाको पनि नारायणीमा मृत्यु भएको डा. दासले जानकारी दिए । हिजो अस्पताल भर्ना भएकी उनको आज मात्र सङ्क्रमण पुष्टि भएको थियो । उनको आज दिउँसो साढे ४ बजे तिर उपचार गर्दागर्दै मृत्यु भएको डा. दासले बताए ।