बिरगंजको गैरसरकारी सस्था सानो पाईलाले नारायणी अस्पताल बिरगंजलाई ३ थान भेन्टीलेटर हस्तान्तरण
वीरगंज संजाल
३ जेष्ठ २०७८, सोमबार २१:४८
३५६१
वीरगंज। वीरगंजको गैरसरकारी संस्था सानो पाइलाले नारायणी अस्पताल वीरगंजलाई ३ थान भेन्टिलेटर सहयोग गरेको छ। अस्पतालका निमित्त मेसु डा. एनामुल हकलाई संस्थाका दीपेश सर्राफको टोलीले भेन्टिलेटर हस्तान्तरण गरेको हो।नारायणी अस्पतालमा भेन्टिलेटरको अभाव रहेकाले संस्थाले समाजिक सेवा अन्तर्गत सहयोग गरेको संस्थाका कार्यकारी निर्देशक कञ्चन झाले बताए।
हाइफ्लो नेजल, क्यानुला, नन् इन्भेसिभ भेन्टिलेटरसहितका सामग्री पनि सहयोग गरिएको हो | सहयोग हस्तान्तरण कार्यक्रममा भेन्टिलेटरहरुमा जडान हुने एल्बो किट, न्याजल क्यानुला, वाटर चेम्बर र प्याटेन्ट सर्किटलगायतका चार सेट मेडिकल उपकरण एनपीएल समाज कल्याण संस्था वीरगंजसँगको समन्वयमा प्राप्त भएको जनाइएको छ।
साथै राष्ट्रिय आविष्कार केन्द्रबाट प्राप्त भएका अक्सिजन स्पिल्टिर पाँच सेट पनि अस्पताललाई हस्तान्तरण गरिएको सो संस्थाले जनाएको छ। यस्ता उपकरणको सहायताले एउटै अक्सिजन सिलिन्डरबाट दुई जना बिरामीलाई अक्सिजन सर्पोट दिन सकिन्छ।श्वासप्रश्वासको समस्या भएका बिरामीहरुलाई यस प्रकारको भेन्टिलेटरले उच्च गतिमा अक्सिजन दिन सकिने जनाइएको छ।
यससँगै नारायणी अस्पतालमा भेन्टिलेटरहरुको संख्या २१ पुगेको नारायणी अस्पतालका कोभिड संयोजक डा. सरोजरोशन दासले बताए।
यसअघि पनि वैशाख १४ गते सानो पाइलाले नारायणी अस्पताललाई ६ थान भेन्टिलेटर सहयोग गरेको थियो।
वीरगंज संजाल
