बिरगंज । पहिलो चरणको कोरोना भाइरस संक्रमण रोकथाम तथा नियन्त्रण र प्रभावितहरुलाई सहयोग गर्न महत्वपूर्ण भुमिका निर्वाह गरेको कोभिड एक्सन टिम (क्याट) ले पुनः सक्रियता बढाएको छ । नयाँ भेरियन्टसहितको कोरोना भाइरस संक्रमणले भयावह बनाएको अवस्थामा क्याटको सक्रियतालाई अर्थपूर्ण रुपमा हेरिएको छ । यस अघि आइतवार बैठक बसी आफ्ना गतिविधिलाई सक्रियता बनाउने निर्णय गरेको क्याटले सोही दिन वीरगञ्जको नारायणी अस्पतालमा अनुगमन समेत गरेको थियो ।

यस्तै सोमवार बिहानै नारायणी अस्पतालमा उपचाररत कोरोना संक्रमित र उनिहरुका कुरुवाहरुको लागि क्याटले १ सय ५० जनाको लागि खाजा (दुध, पावरोटी र अण्डा) वितरण गरेको थियो । अस्पतालका कोभिड संयोजक सरोजरोशन दासलाई खाजा उपलब्ध गराउनुका साथै अस्पतालभित्रका समस्याहरु समाधान गर्न समेत ध्यानाकर्षण गराएको क्याटका सदस्य एवम् जनता समाजवादी पार्टी (जसपा) पर्साका सचिब तबरेज अहमदले बताए ।

त्यसैगरी सोमवार नै क्याट पर्साका संयोजक एवम् जिल्ला समन्वय समिति पर्साका सभापति नेकमहद अन्सारी नेतृत्वको टोलीले वीरगञ्ज महानगरपालिका वडा नम्बर १६ नगवास्थित बाबा होटेलमा नेशनल मेडिकल कलेजले सञ्चालन गरेको अस्थाई कोभिड अस्पतालमा पनि स्थलगत निरिक्षण गरेको छ । निरिक्षणको क्रममा क्याटले अस्पतालमा उपचाररत कोभिड संक्रमितहरुको स्वास्थ्य अवस्था र अस्पताल प्रशासनको व्यवस्थापन लगायतको बारेमा जानकारी लिएको अहमदले बताए । अनुगमनको क्रममा अक्सिजनको अभाव फेला परेको नेपाली काङ्ग्रेस पर्साका सचिब एवम् क्याटका सदस्य श्याम पटेलले बताए ।

अस्पतालमा कोरोना संक्रमितको उपचारमा खटिएको डा. ओमप्रकाश का अनुसार आवश्यता तथा मागबमोजिमको अक्सिजन आपुर्ति हुन सकिरहेको छैन । हरेक दिन १२ घण्टामा लगभग २ सय भन्दा धेरै अक्सिजनको माग भएपनि आपुर्ति भने जम्मा ३० वटा मात्रै हुने गरेको उनले बताए । फलस्वरुप अक्सिजत अभावलाई परिपुर्ति गर्ने अभिप्रायले पर्सा जिल्लाका प्रमुख राजनितिक दलका प्रतिनिधिहरु सहित सरोकारवालाहरुको ध्यानाकर्षण गराइने क्याटले जनाएको छ । अनुगमन टोलीमा नेकपा एमालेबाट सञ्जिव मिश्रा, नेकपा माओवादी केन्द्रका बाबुराम कौशिक लगायतको सहभागिता रहेको थियो ।