जनकपुर | प्रादेशिक अस्पतालको लापरबाहीका कारण फेरि एक कोरोना संक्रमितको निधन भएको छ ।अस्पताल पुगेको घण्टौं बितेपनि अस्पतालले समयमै आईसीयु र भेन्टिलेटर उपलब्ध नगराउँदा महोत्तरीको औरही नगरपालिका–८ टिमकियाका ५५ वर्षीय श्याम यादवको निधन भएको हो ।

जसपाका स्थानीय नेता समेत रहेका यादवलाई प्रादेशिक अस्पतालमा उपचारमा कुनै लापरबाही नगर्न उनको परिवारजनले आग्रह गरेपनि अस्पतालले उपचारमा लापरबाही गर्दा उनको मृत्यु भएको उनका छोराले जानकारी दिए ।

प्रादेशिक अस्पताललाई आइसीयू र भेन्टिलेटरका लागि जति गुहार गरेपनि अस्पताल प्रशासनले कुनै सुनुवाई नगरेको मृतकका छोराको आरोप छ । उनी गत बैशाख ३० गते कोरोना संक्रमित भएका थिए ।

यसअघि बैशाख ३० गते पनि अस्पतालको लापरबाहीका कारण जनकपुरधाम उपमहानगरपालिका वडा नम्बर–१९ बेङ्गाशिवपुर बस्ने ४५ वर्षीय उमेश शर्माको ज्यान गएको थियो । अस्पताल पुर्याइएको तिनघण्टासम्म पनि भेन्टिलेटर उपलब्ध नहुँदा उनको मृत्यु भएको थियो ।

त्यस्तै बैशाख २८ गते पनि कोभिड–१९ विशेष अस्पतालमा चिकित्सकको लापरवाहीका कारण महोत्तरीको जलेश्वर नगरपालिका वडा नम्बर–४ सुगा बस्ने ५३ वर्षीय कोरोना संक्रमित सुखचैन महतोको मृत्यु भएको थियो ।