वीरगञ्ज। नारायणी अस्पतालमा उपचाररत थप ५ जना कोभिड-१९ (कोरोनाभाइरस) सङ्क्रमितको मृत्यु भएको छ ।सङ्क्रमण पुष्टि भएर उपचाररत २ महिलासहित ५ जना सङ्क्रमितको मृत्यु भएको अस्पतालले जनाएको छ । मृत्यु हुनेमा ४ जना बारा र १ जना सर्लाहीका बासिन्दा हुन् ।
अस्पतालका कोभिड संयोजक डा. सरोज रोशन दास अनुसार मृत्यु हुने सबैमा गम्भीर किसिमको निमोनिया देखिएको थियो । उनीहरुलाई अस्पतालस्थित अईसियूमा हाईफ्लो अक्सिजन सपोर्टमा राखेर उपचार गर्दागर्दै मृत्यु भएको डा. दासले बताए ।

मृत्यु हुनेमा बारा जिल्लाको निजगढ नगरपालिका वडा नम्बर ७ निवासी ४३ वर्षीय पुरुष रहेका छन् । स्वास्थ्यमा समस्या भएपछि उनलाई बैशाख ३१ गते अस्पताल भर्ना गरिएको थियो । भर्ना पश्चात कोरोनासँग मिल्दोजुल्दो लक्षण देखिएपछि जेठ १ गते आरटी-पिसिआर प्रविधिबाट उनको स्वाब परिक्षण गर्दा कोरोना पुष्टि भएको थियो । सङ्क्रमण पुष्टि पश्चात उनलाई अईसियूमा राखेर उपचार गर्दागर्दै साँझ ६ बजे मृत्यु भएको डा. दासले बताए ।

त्यसैगरी बाराकै पर्सौनी गाउँपालिका वडा नम्बर ५ निवासी ४६ वर्षीय पुरुषको पनि गएरति सङ्क्रमणबाट मृत्यु भएको छ । बैशाख २१ गते कोरोना सङ्क्रमण पुष्टि भएर अस्पतालमा उपचाररत उनको गएराती १० बजेर ४५ मिनटमा मृत्यु भएको डा. दासले जानकारी दिए ।

त्यस्तै बारा जिल्लाको सूवर्ण गाउँपालिका वडा नम्बर २ निवासी ६० वर्षीय पुरुषको आज बिहान अस्पतालमा मृत्यु भएको छ । उनको बिहान २ बजेर १५ मिनटमा मृत्यु भएको डा. दासले जानकारी दिए । बैशाख ३० गते कोरोना सङ्क्रमण पुष्टि भएर अस्पताल भर्ना भएका उनको उपचार गर्दागर्दै आज बिहान मृत्यु भएको हो ।

त्यसैगरी बाराको कलैया उपमहानगरपालिका वडा नम्बर २५ निवासी ३८ वर्षीय महिलाले पनि सङ्क्रमणबाट ज्यान गुमाएकी छन् । उनको आज बिहान ४ बजेर १० मिनटमा मृत्यु भएको डा. दासले बताए । डा. दास स्वास्थ्यमा समस्या देखिएपाची उनलाई बैशाख २५ गते अस्पताल भर्ना गरिएको थियो । अस्पतालमा उनलाई कोरोना जस्तो लक्षण देखिएपछि परिक्षण गर्दा बैशाख २७ गते उनमा सङ्क्रमण पुष्टि भएको थियो ।

सर्लाहीको फरावता निवासी ४७ वर्षीय महिलाको पनि आज बिहान मृत्यु भएको छ । उनलाई कोरोना पुष्टि भएपछि बैशाख २१ गते अस्पताल भर्ना गरिएको डा. दासले बताए । सोहि दिनदेखि उनलाई आइसियूमा राखेर उपचार गरिँदै थियो । उनको आज बिहान ५ बजेर ३० मिनटमा मृत्यु भएको डा. दासले बताए ।मृत्यु भएका कुनैपनि सङ्क्रमितले कोरोना विरुद्धको खोप नलिएको डा. दासले जानकारी दिए ।