वीरगञ्ज । निःशूल्क खाना खुवाइरहेका संघ संस्थाहरुलाई वीरगञ्ज महानगरपालिकाले खाद्यान्न सामाग्री सहयोग गरेको छ । वीरगञ्जमा कोरोना भाइरस संक्रमण रोकथाम तथा नियन्त्रणका लागि जारी निषेधाज्ञामा निःशूल्क खाना खुवाइरहेका संघ संस्थाहरुलाई वीरगञ्ज महानगरपालिकाले खाद्यान्न सामाग्री सहयोग गरेको छ ।बढ्दै गरेको कोभिड १९ संक्रमणको चेन ब्रेक गर्न लगाइएको निषेधाज्ञाका कारण प्रभावित नियमित ज्यालामजदुरी गरेर जीवन निर्वाह गर्दै आएकाहरुलाई खाना खुवाउन संघ संस्थाहरुको सक्रियताको वीरगञ्ज महानगरपालिकाका नगरप्रमुख विजय कुमार सरावगीले सह्राना गरेका छन् । स्थानीय सरकारले गर्ने काम संघ संस्थाहरुले गरेकोमा खुशी व्यक्त गर्दै उनिहरुको हौसलास्वरुप खाद्यान्न सामाग्री उपलब्ध गराइएको नगरप्रमुख सरावगीले यात्राडेलीलाई बताए ।

यसअघि शुक्रवारमात्रै निःशूल्क भोजन गराउन चाहने संघ संस्थालाई खाद्यान्न सामाग्रीको जोहो गर्ने प्रतिबद्धता गरेका नगरप्रमुख सरावगीले शनिवार वीरगञ्जमा ४ वटा संस्थालाई खाद्यान्न सामाग्री उपलब्ध गराएका हुन् ।निःशूल्क भोजन गराउँदै आएको रेलवे कटेजलाई ३० बोरा (७५० किलो) चामल २ बोरा दाल र ६० लिटर खानेतेल, सानो पाईलालाई २८ बोरा चामल, ३५ किलो दाल र २८ लिटर खानेतेल, हण्ड्रेड्स ग्रुप नेपाललाई १ सय २५ किलो चामल, २५ किलो दाल, २१ लिटर खानेतेल, इम्प्रुभिङ् वीरगञ्जलाई ७ बोरा चामल, ३५ किलो दाल र ५० लिटर खानेतेल उलब्ध गराइएको हो ।

वीरगञ्ज महानगरपालिकाले गरेको सहयोगले अँझै हौसला प्राप्त भएको रेलवे कटेजका सञ्चालक रवी गुप्ताले बताए ।निषेधाज्ञाबाट प्रभावित भएकाहरुको भोक मेटाउने अभियानलाई अँझै निरन्तरता दिन टेवा पुगेको बताउँदै अभियानका संयोजकसमेत रहेका गुप्ताले खुशी व्यक्त गरे । त्यसैगरी हण्ड्रेड ग्रुपका कोषाध्यक्ष आशिष गुप्ताले पनि महानगरपालिकाले उपलब्ध गराएको खाद्यान्नले नगरवासीको भोक मेटाउने ढृढता व्यक्त गरे ।