रौतहट। भारतबाट अवैध तरिकाले भन्सार छली गरेर ल्याउँदै गरेको एण्डरोइड फोन बरामद गरेको छ । जिल्ला प्रहरी कार्यालय रौतहटले अढाई लाख रुपैयाँ बराबरको भन्सार छलीको मोबाइल फोन बरामद गरेको छ ।प्रहरीले शुक्रबार भारतबाट अवैध तरिकाले भन्सार छली चोरी पैठारी गरेर ल्याउँदै गरेको विभिन्न कम्पनिको १२ थान एण्डरोइड फोन बरामद गरेको हो ।

जिल्लास्थित ईशनाथ नगरपालिका वडा नम्बर ४ लतमरी नैजिकै रहेको भारतीय बजारबाट मोबाइल फोन खरिद गरी भन्सार छलेर नेपालमा विक्री गर्न ल्याउँदै गरेको रेडमी कम्पनिको ७ थान, रियलमी कम्पनिको ४ थान र ओप्पो कम्पनिको १ थान गरी १२ थान मोबाइल फोन बरामद गरिएको रौतहट प्रहरीले जनाएको छ ।

भारतबाट झोला भित्र राखेर ल्याउँदै गरेको व्यक्तिले प्रहरीलाई देख्नसाथ झोला छोडेर फरार भएर भएको प्रहरीले बताएको छ । बरामद गरिएको मोबाईल प्रहरी टोलीले वेवारीसे अवस्थामा फेला पारी रित पूर्वक बरामद गरी थप कारवाही भईरहेको छ ।