वीरगन्ज । कोरोना संक्रमणको दोस्रो लहरले देशभर अक्सिजनको अभाव सिर्जना भएपछि व्यवस्थापनका लागि गृह मन्त्रालय सक्रिय भएको छ । महामारीबाट उत्पन्न परिस्थितिमा अक्सिजन अभाव हुन नदिन मन्त्रालयले सक्रियता बढाएको छ ।
प्रदेश १ को मोरङ र सुनसरीमा रहेका विभिन्न अक्सिजन प्लान्टबाट अक्सिजन सिलिन्डर रिफिल गरेर मन्त्रालयले एयर लिफ्ट तथा स्थलमार्गबाट राजधानी ल्याउन सुरु गरेको छ । नेपाली सेनाको स्काई ट्रकमार्फत मन्त्रालयले अक्सिजनको व्यवस्थापन थालेको हो ।
गृहले कोभिड उपचारमा अत्यावश्यक बन्दै गएको अक्सिजन अभाव हुन नदिन तथा आपूर्ति तथा वितरण प्रणाली भरपर्दो तथा व्यवस्थित बनाएर अभाव हुनबाट रोक्न सक्रियता बढाएको जनाएको छ । यसलाई अभियानकै रूपमा चलाइने समेत उल्लेख गरेको छ ।
अस्पतालबाहेक अन्य प्रयोजनका लागि विभिन्न उद्योग, व्यवसाय, आयोजना, इन्जिनियरिङ कलेज, सिटिइभिटीका तालिम केन्द्र तथा व्यक्तिसँग रहेका अक्सिजन सिलिन्डर नजिकको स्थानीय प्रशासन, सुरक्षा निकायमा बुझाएर कोरोना संक्रमितको उपचारमा सहयोग गर्नसमेत मन्त्रालयले आग्रह गरेको छ ।
मन्त्रालयमार्फत समन्वय भएर पछिल्लो २ दिनमा १ सय १९ वटा अक्सिजन सिलिन्डर काठमाडौं उपत्यका भित्रिएका छन् । बिहीबार ६० तथा शुक्रबार ५९ गरी १ सय १९ वटा अक्सिजन सिलिन्डर नेपाली सेनाको स्काई ट्रकमार्फत काठमाडौं ल्याइएको र स्थलमार्गबाट समेत ल्याउनेगरी आवश्यक तयारी गरेको मन्त्रालयले जनाएको छ ।
