वीरगन्ज । अक्सिजनको चरम अभाव रहेको रुपन्देहीमा भारतबाट पाँच सय सिलिन्डर भर्न मिल्ने लिक्विड अक्सिजन ल्याइएको छ ।जिल्लाको छिपागढमा रहेको शंकर ग्यास उद्योगले शुक्रबार भारतबाट लिक्विड ग्यास आयात गरेको हो ।
रुपन्देहीमा अहिले कोरोना भाइरसका बिरामीका लागि अक्सिजन हाहाकार छ । जिल्लामा बढ्दो अक्सिजन ग्यासको मागलाई धान्न नसकेपछि उद्योगले शंकर ग्यासले भारतबाट लिक्विड ग्यास आयात प्रमुख जिल्ला अधिकारी अस्मान तामाङले लोकान्तरलाई जानकारी दिए ।
शुक्रबार आयात गरिएको ग्यास पाँच सय सिलिन्डर रहेको छ । शुक्रवार बिहान ९ बजे भैरहवा भन्सार कार्यालयमा आवश्यक कागजात प्रकृया पूरा गरेर उद्योगले अक्सिजन उद्योगसम्म पुर्याएको छ ।
उद्योगले दैनिक पाँच सय सिलिन्डर अक्सिजन उत्पादन गर्दै आएको थियो । रुपन्देहीमा रहेका पाँच वटा कोभिड अस्पतालले दैनिक दुई हजार एक सय ५० बढी सिलिन्डर अक्सिजन माग गर्ने गरेकोमा उत्पादन भने ११ सय सिलिण्डर रहेको जिल्ला जनस्वास्थ्य प्रशासक डा.राजेन्द्र गिरीले जानकारी दिए ।
रुपन्देहीमा रहेका तीनवटा उद्योगमा उत्पादन भएका ग्यासबाट काम गर्दै आएका थिए ।केही दिन अगाडि अक्सिजन अभाव भएपछि केन्द्र सरकार, प्रदेश सरकार र स्थानीय तहले समन्वय गरेर हेलिकोप्टरमा ४० सिलिन्डर ग्याँस चितवन र सिमराबाट नेपाली सेनाको हेलिकप्टरमार्फत रुपन्देही ल्याइएको थियो ।
गएको बुधवार अक्सिजन सकिएर बुटवलको कोभिड अस्पतालमा ५ जना र भैरहवाका भीम अस्पतालमा उपचार गराइरहेका ३ जना बिरामीको मृत्यु भएको थियो ।