बीरगन्ज। समुदायमा संक्रमण फैलिएको पर्साको जगरनाथपुर गाउँपालिकाको एउटा टोललाई सिल गरिएको छ । घरघमा ज्वरोका बिरामी फेला पर्न थालेपछि जगरनाथपुर वडा नं ५ को चिलझपटी टोललाई सिल गरिएको हो ।

मंगलबार ११ जनाको एन्टिजेन परीक्षण गर्दा ७ जनामा संक्रमण पुष्टि भएपछि जनस्वास्थ्य कार्यालय र सुरक्षाकर्मीहरुको बैठकले टोललाई सिल गर्ने निर्णय गरेको गाउँपालिकाका स्वास्थ्य शाखा प्रमुख प्रभेन्द्र प्रसाद साहले जानकारी गराए । पछिल्लो १० दिनमा ११ जनाको मृत्यु र घरैपिच्छे ज्वरोका बिरामी देखिएकाले नारायणी अस्पतालसँगको समन्वयमा उक्त टोलमा सर्वसाधारणको हिँड्डुलमा कडाई गरिएको साहले जानकारी गराए । साहका अनुसार संक्रमणकौ शंका नगरिएको व्यक्तिमा व्यक्तिमा पनि संक्रमण पुष्टि भएको छ ।

‘सबै जनाको परीक्षण गर्न सम्भव छैन । त्यसैले सामान्य लक्षण देखिएकाहरुलाई होम आइसोलेसनमै राखेर औषधी दिइरहेका छौं’, साहले भने, ‘लक्षण देखिएकाहरुलाई नारायणी रेफर गर्ने योजना छ।’

टोललाई सिल गरेर होम आईसोलेसनमा रहेकाहरुलाई रोग प्रतिरोधात्मक क्षमता उच्च पार्ने औषधीहरु गाउँपालिकाबाट वितरण भईरहेको साहले बताएका छन् । बिहीबार पनि गाउँपालिकको स्वास्थ्य शाखाले चिलझपटीका स्थानियहरुलाई औषधी वितरण गरेको छ ।

यसअघि गाउँपालिकाको स्वास्थ्य शाखाले सोमबार जिल्ला प्रशासन कार्यालय, नारायणी अस्पताल र स्वास्थ्य कार्यालयलाई पत्राचार गरी विज्ञ टोली पठाउन अनुरोध गरेको थियो । मंगलबार बीरगन्जबाट पुगेको स्वास्थ्यकर्मीहरु र स्थानिय स्वास्थ्य शाखाको टोलिले चिलझपटीका ११ जनाको एन्टिजेन परीक्षण गर्दा ७ जनामा संक्रमण पुष्टि भएको थियो ।

त्यस्तै मंगलबार नै पीसीआर परीक्षणका लागि २५ जनाको स्वाब संकलन गर्दा परीक्षण रिपोर्ट अझै आईनसकेको स्वास्थ्य शाखा प्रमुख साहले जानकारी गराए । साहका अनुसार चिलझपटी टोलमा वैशाख २० देखि २७ सम्ममा ७ जनाको मृत्यु भएको छ । स्वास्थ्य शाखाका अनुसार मृत्यु भएका ४ जनामा कोरोनासँग मिल्दोजुल्दो लक्षण भए पनि परीक्षण गरिएको थिएन ।

यता, जगरनाथपुर गाउँपालिकाले बीरगन्जस्थित तेजारथ टोलमा २५ बेडको अस्थायी कोभिड अस्पताल निर्माण गरेको छ । गाउँपालिकामा होम आईसोलेसनमा रहेका बिरामीहरुलाई अक्सिजन सपोर्टमा उपचार गर्नुपरे अस्थायी कोभिड अस्पतालमा ल्याइने जनाइएको छ ।