वीरगन्ज । सत्तारूढ नेकपा (एमाले) को पार्टी जीवनमा निम्ति आज कठिन र कष्टसाध्य दिन बनेको छ । पार्टीका नेता माधवकुमार नेपालले ६ बुँदे शर्त मानेमात्रै विश्वासको मत हाल्ने वातावरण बन्ने अन्यथा राजीनामाको बाटो छिचोल्न बाध्य हुने बताएपछि प्रधानमन्त्री केपी शर्मा ओली समूहले ‘नधम्क्याउन’ भनेको छ ।

“मध्यरात प्रधानमन्त्रीलाई सम्बोधन गरेर एकताका लागि पहल गरेको भान पार्न भावुक पत्र सार्वजनिक गर्ने, अर्कोतिर सांसदहरूलाई फोन गरेर, ओलीको अहम् ढाल्नुपर्ने भयो, आउनुस् राजीनामाको पक्षमा उभिनुस् भनेर हारगुहार पनि गर्ने, यस्तो काइदा पो देखियो,” ओली पक्षका एक नेताले भने ।

उनले आजै प्रधानमन्त्री ओली र नेता नेपालबीच ‘चामत्कारिक समझदारी’को सम्भावना भने क्षीण भएको बताए ।

नेपाल समूहका प्रभावशाली नेताहरूले आइतबार रातभर समानुपातिक सांसदहरूलाई फोन गरेको ओली पक्ष बताउँछ । “पार्वती बिसुङ्खेलगायत नेताहरूलाई फोन गरेर उहाँहरूले राजीनामाको पक्षमा उभिनुस्, नयाँ पार्टी खोल्नुपर्‍यो भन्नुभएछ । उहाँ त पहिल्यै एकताको पक्षमा हुनुहुन्थ्यो । मूलधार त्याग्न सक्ने कुरा भएन । यसरी उहाँहरूले रातभर कसकसलाई केके प्रलोभन देखाउनुभयो, त्यसको सबै सूचना प्रधानमन्त्रीसँग छ । उहाँहरूसँग वार्ताको सम्भावना त होला, आजै, अहिले नै भन्ने केही पनि छैन,” स्रोत भन्छ ।

‘नेपाल मौन नै बसे’
पछिल्लो समय नेता नेपालले आफूलाई वचनमा अडिने नेताको रूपमा देखाउँदै आएकाले अहिले त्यही छवि एकताको बाधक भएको ओली समूह बताउँछ । “उहाँले कांग्रेससहित गठबन्धनलाई ओलीसँग सम्बन्धविच्छेद गरेर आउने वचन दिइसक्नुभएको छ । त्यो वचन काट्न उहाँले सक्नुभएको छैन । अतः संवादको नाटकको आरोप हामीलाई लगाउनु भएको रहेछ । वास्तवमा नाटक हामीले होइन, उहाँले नै गरिराख्नुभएको छ,” ओली पक्षका नेता आक्रोशित हुँदै सुनाउँछन् ।

नेता नेपाल समूहले राजीनामाका लागि सिंहदरबारमा सांसदहरू बटुल्दै गर्दा विष्णु पौडेल र सुवास नेम्वाङ संसद् सचिवालयको दुई नम्बर बिल्डिङमा पुगेका थिए । नेता नेपाल भेट्नका लागि । संसद् भवनको चौथो तलाको ४११ नम्बर कोठामा उनीहरूबीच पौने घण्टा संवाद भएको थियो ।

“संवादमा उहाँले मुन्टो मात्रै हल्लाउनु भएछ । नेता नेम्वाङ र पौडेलले ‘राजीनामाको हल्ला रहेछ । संवादको सम्भावना सकिइसकेको पनि होइन । तपाईंहरू त्यो बाटो नहिँड्नुस्’ भन्दा उहाँले थाहा नपाएजस्तो रहस्यमय मौनता साँध्नु भएछ,” ओली पक्षका एक प्रभावशाली नेता भन्छन्, “त्यो कुरा उहाँहरूले बालुवाटारमा आएर पनि सुनाउनु भयो । त्यसपछि पनि विभिन्न माध्यमबाट उहाँहरूसँग संवाद नभएको होइन । उहाँहरू मिल्नै चाहनुहुन्न । मिलन विन्दु खोजौँ न त भन्दा त्यो पनि दिनुहुन्न,” ओली पक्षको जिकिर छ ।