बीरगन्ज । बीरगन्जका अधिकांश कोभिड अस्पतालहरुमा अक्सिजन उपलब्ध गराउँदै आएको मधु अक्सिजन उद्योगका कर्मचारीहरु जोखिममा परेको देखिएको छ । कोरोनाका बिरामीहरुको उपचारमा अत्यवाश्यक अक्सिजन सप्लाई गर्ने उद्योगका कर्मचारीहरु प्रति अस्पताल संवेदनशिल नहुँदा जोखिम बढेको हो ।

उद्योगले नै बीरगन्जको नारायणी अस्पताल, नेशनल मेडिकल कलेजको कोभिड अस्पताल लगायतका ठाउँहरुमा अक्सिजन सिलिण्डरको सप्लाई गर्दै आएको छ । उद्योगका कर्मचारीहरुले अस्पतालको आईसियुसम्मै अक्सिजन पुयार्उनु पर्दा स्वास्थ्य जोखिम झनै बढेर गएको उद्योग प्रशासनले जनाएको छ । यसरी र्आइसियुसम्मै अक्सिजन पुर्याउने उद्योगका कर्मचारीहरुलाई अस्पतालले कुनै प्रकारको स्वास्थ्य सुरक्षा उपकरण उपलब्ध नगराउँदा संक्रमित हुने सम्भावना बढेको उद्योग प्रशासनको आरोप छ ।

अक्सिजन सिलिन्डर अस्पतालको परिसरसम्म पुर्याउने जिम्मा मात्रै आफुहरुको भएको बताउँदै उद्योग प्रशासनले अस्पतालका कर्मचारीले सिलिन्डर संक्रमितहरुको बेडसम्मै राख्न लगाउने गरेको बताए । उद्योगका सञ्चालक रामबाबु रौनियार अहिले होम आइसोलट भएर बसेका छन् भने उद्योगको लेखामा कार्यरत २ जना स्टाफ पनि आइसोलेट भएर बसेको रौनियारले बताए ।

अस्पताल प्रशासनले अक्सिजन अनलोड भएपछि खाली सिलिण्डर बाहिरै निकालेर राखिदिए र समयमै गाडीलाई पठाइदिए सहज हुने रौनियारको माग छ । विगतमा दैनिक मुश्किलले १ सय सिलिण्डर खपत हुने गरेकोमा अहिले दैनिक ६ सय सम्म सिलिण्डर बिक्रि हुने गरेको उद्योगका प्रबन्धक रिक्की रौनियारले बताए । उद्योगसँग रहेका ४ वटा गाडीमध्ये जनशक्तिको अभावका कारण १ वटा गाडी थन्किएको छ भने ३ वटा गाडीमार्फत अक्सिजन सिलिण्डरको ढुवानी भइरहेको छ ।

उद्योगका प्रबन्धक रौनियारका अनुसार बिहान ६ बजे अक्सिजन लिएर अस्पताल पुगेको गाडीलाई अस्पतालले ६ देखि ८ घण्टासम्म रोकेर राखिदिने गरेको छ । जसका कारण यहाँका अन्य अस्पतालमा समयमै अक्सिजन उपलब्ध गराउने सकस भईरहेको उनले गुनासो गरे । सरकारले उपलब्ध गराएको भ्याक्सिन उद्योगका कर्मचारीलाई पनि उपलब्ध गराए कर्मचारीको मनोवल उच्च हुने र नडराएर काम गर्ने वातावरणको सृजना हुने उनको भनाई छ ।

उद्योगमा कार्यरत ३० जना कर्मचारीमध्ये लगभग १२ जना कर्मचारीहरु नियमित रुपमा अकिसजन दिने र खाली सिलिण्डर लिने कामका कारण प्रत्यक्ष रुपमा संक्रमितको सम्पर्कमा आइरहेका छन् । प्रबन्धक रौनियारका अनुसार दैनिक ८ सय पिस अक्सिजनको उत्पादन क्षमता रहेको उद्योगबाट अहिले ६ सय पिस मात्रै उत्पादन भइरहेको छ । अक्सिजन उत्पादन र ढुवानीमा काम गर्नेहरुलाई पनि प्राथमिकतामा राखेर भ्याक्सिन उपलब्ध गराउनुपर्ने उद्योगको मुख्य माग छ ।