वीरगन्ज । पर्सामा आज उपचारको क्रममा ३ जना कोभिड १९ संक्रमितको मृत्यु भएको छ । वीरगंजको नारायणी अस्पतालमा उपचाररत २ जना बाराका परुष र १ जना पुरुष कोभिड १९ संक्रमितको मृत्यू भएको हो ।

बैशाख २१ गते एन्टिजेन रिपोर्ट पोजेटिभ आएका रौतहटको सिरसियाका ५५ वर्षीय पुरुष, बाराका ४५ वर्षीय पुरुष र बाराको जितपुर सिमरा उपमहानगरपालिका वडा नम्बर २ निवासी ५५ वर्षीय पुरुषको मृत्यु भएको थियो । रौतहटका कोरोना संक्रमित ५५ वर्षिय २२ गते विरगंज स्थित नारायणी अस्पतालमा भर्ना भएका थिए ।

उनी निमोनियाबाट ग्रसित रहेको र उनको उपचारको क्रममा शनिवार बिहान मृत्यु भएको नारायणी अस्पतालका कोभिड संयोजक डा. सरोज रोशन दासले जानकारी दिए ।

बैशाख २१ गते गरिएको एन्टिजेन परीक्षणमा पोजेटिभ रिपोर्ट आएका बाराका ४५ वर्षीय पुरुषलाई २२ गते नारायणी अस्पतालमा भर्ना गरिएको थियो । त्यस्तै शुक्रवार राति १० बजे अर्का एकजना बाराकै पुरुषको पनि मृत्यु भएको थियो ।

वैशाख ३ गते भारतको दिल्लीमा गरिएको पिसिआर परीक्षणमा उनको रिपोर्ट पोजेटिभ आएको थियो । तीनै जना निमोनियाबाट ग्रसित रहेको उनले बताए ।