वीरगञ्ज । वीरगञ्जमा मंगलबार राति थप एकजना कोरोनाभाइरस सङ्क्रमितको मृत्यु भएको छ । नारायणी अस्पतालमा उपचाररत ४० वर्षीय पुरुषको सङ्क्रमणका कारण मंगलबार राति मृत्यु भएको अस्पतालले जनाएको छ ।अस्पतालका कोभिड संयोजक डा. सरोज रोशन दास अनुसार वीरगञ्ज महानगरपालिका आदर्शनगर ठेगाना उल्लेख भएका ४० बर्षीय पुरुषको सङ्क्रमणका कारण मृत्यु भएको हो ।

बैशाख १३ गते कोरोना रिपोर्ट पोजेटिभ आएको उनलाई बैशाख १६ गते बिहीबार अस्पताल भर्ना गरिएको थियो ।जिल्ला प्रशासन कार्यालय पर्साका कोभिड सम्पर्क व्यक्ति विनय कुमार श्रीवास्तवका अनुसार कोरोनाको दोश्रो लहर शुरु भए यता चैत ३१ देखि बैशाख २१ गते मंगलबार बिहानसम्म वीरगञ्जमा कोरोनाले ३६ जनाको मृत्यु भएको छ ।

मंगलबार राति एकजनाको मृत्यु भएपछि मृत्यु हुनेको संख्या ३७ पुगेको छ । मृत्यु भएकामध्ये वीरगञ्जको नारायणी अस्पतालमा २९ जनाको, नारायणी बयोधा अस्पतालमा ४ जना, नेशनल मेडिकल कलेजद्वारा सञ्चालित कोरोना अस्पतालमा ३ जना र गण्डक अस्पतालमा १ जनाको मृत्यु भएको हो । मृतक ३७ जनामध्ये पर्साका २६ जना, बाराका ७, सर्लाहीका २ जना, रौतहटका १ जना र एक जना भारतीय नागरिक रहेको श्रीवास्तवले बताए ।