बिरगंज । मंगलबार बसेको काठमाडौं, भक्तपुर र ललितपुरका प्रमुख जिल्ला अधिकारीहरूको संयुक्त बैठकले पत्रकारहरूको आवतजावतमा पनि कडाइ गर्ने निर्णय गरेको हो।
काठमाडाैंका प्रमुख जिल्ला अधिकारी कालीप्रसाद पराजुलीले सूचना विभागको परिचयपत्र भएका पत्रकारलाई मात्र आवातजावत गर्न दिने निर्णय भएको बताए।
यसअघि सम्बन्धित सञ्चारगृहको परिचय भएका पत्रकारले आवातजावत गर्न पाउने व्यवस्था रहेकोमा सूचना विभागको कार्ड अनिवार्य गरिएको हो।
यसअघि शुक्रबार साँझ बसेको कोभिड-१९ संकट व्यवस्थापन केन्द्र (सीसीएमसी)को बैठकले पनि सूचना विभागको कार्ड भएका पत्रकारलाई मात्र आवातजावत गर्न दिने निर्णय गरेको थियो।
यसैबीच, काठमाडौं उपत्यकामा वैशाख १६ गते बिहानदेखि लागू गरिएको निषेधाज्ञा आउँदो २९ वैशाखसम्म निरन्तर कायम राख्ने निर्णय पनि गरिएको छ।
प्रमुख जिल्ला अधिकारीहरूको बैठकले दैनिक उपभोग्य वस्तुका पसल खोल्ने समयमा पनि कडाइ गर्ने निर्णय गरेको छ। अब बिहान ७ देखि ९ बजेसम्म मात्र पसल खोल्न पाइनेछ। यसअघि बेलुका २ घण्टा पनि पसल खोल्न दिने गरिएको थियो।
