वीरगन्ज । भारतमा जारी इन्डियन प्रिमियर लिग क्रिकेटअन्तर्गत गएराति भएको खेलमा मुम्बई इन्डियन्सले शानदार जीत निकालेको छ । मुम्बईले चेन्नई सुपर किङ्सलाई ४ विकेटले हराएको हो ।
चेन्नईले दिएको २१९ रनको विशाल लक्ष्य पछ्याएको मुम्बईले अन्तिम बलमा लक्ष्य भेट्टाएको हो । मुम्बईका लागि कायरन पोलार्डले विस्फोटक ब्याटिङ गरेका थिए । उनले केवल ३४ बलमा ८७ रनको अविजित पारी खेले जसमा ६ चौका र ८ छक्का सामेल थिए । अन्तिम ओभरमा १६ रन चाहिएको अवस्थामा पोलार्डले दुई छक्का प्रहार गर्दा दुई बल डट खेले भने दुईपटक दुई रन लिए । अन्तिम बलमा २ रन चाहिएको अवस्थामा उनले २ रन लिएका हुन् ।
त्यसैगरी क्विन्टन डिककले ३८, रोहित शर्माले ३५ र क्रुणाल पान्ड्याले ३२ रन बनाए । चेन्नईका साम करानले ३ तथा शार्दुल ठाकुर, रविन्द्र जडेजा र मोईन अलीले १-१ विकेट लिए ।
त्यसअघि टस हारेर पहिले ब्याटिङ गरेको चेन्नईले निर्धारित २० ओभरमा ४ विकेट गुमाउँदै २१८ रनको योगफल तयार गरेको थियो । उसका लागि अम्बाती रायुडुले अविजित रहँदै ७२ रन बनाए । २७ बल मात्र खेलेका उनले ४ चौका र ७ छक्का प्रहार गरेका थिए ।
त्यसैगरी मोइन अलीले ५८ र ओपनर फाफ डुप्लेसीले ५० रन बनाए । मुम्बईका कायरन पोलार्डले २ विकेट लिँदा जसप्रीत बुमराह र ट्रेन्ट बोल्टले १-१ विकेट हात पारे ।
जीतसँगै ७ खेलबाट ८ अंक जोडेको मुम्बई अंकतालिकाको चौथो स्थानमा यथावत् छ भने पराजित चेन्नई १० अंकसहित शीर्षस्थानमा यथावत रहेको छ ।
प्रतियोगिता अन्तर्गत आज दुई खेल हुँदैछन् । पहिलो खेलमा पुछारका दुई टोली राजस्थान रोयल्स र सनराइजर्स हैदराबाद खेल्दै छन् भने साँझ पञ्जाब किङ्स र दिल्ली क्यापिटल्सबीच प्रतिस्पर्धा हुने छ ।
