वीरगञ्ज। अधिराज्यभरीका २५ भन्दा धेरै जिल्लाहरुमा निषेधाज्ञा जारी गरिएको छ । ति २५ जिल्लाभित्रको एउटा जिल्ला पर्सा पनि हो । पर्सा जिल्ला भारतसँग खुला सीमाना जोडिएको जिल्ला हो । छिमेकी मुलुक भारतमा कोरोना भाइरसको संक्रमण उच्च रुपमा फैलिएको सबैलाई अवगत नै छ ।

यस्तो अवस्थामा खुला सीमानाका जोडिएको क्षेत्रमा कडाई गर्न आवश्यक छ । मुख्य नाका शंकराचार्य गेटमा कडाई गरिएको पाइएको छ । जहाँ हेल्थ डेस्कको स्थापना गरी आवतजावत गर्नेहरुको एन्टिजेन परीक्षण गरेर नेगेटिभ रिपोर्ट आउनेहरुलाई गन्तव्यतर्फ जान दिइएको छ भने पोजेटिभ आउनेहरुलाई रोकेर आइसोलेसनहरुमा पठाउने व्यवस्था गरिएको हेल्थ डेस्कमा खटिएका अहेब दिपेन्द्र प्रसाद गुप्ताले बताए ।

यसरी सीमानाकामा कडाई गर्नु र परीक्षणको व्यवस्था गर्नु अत्यन्तै सह्रानिय कार्य हो, जुन अहिलेको आवश्यक्ता पनि हो । तर शंकराचार्य गेट बाहेकका अन्य नाकाहरुमा भने यस्तो सर्तकता अपनाएको पाईदैन ।

जिल्ला कोभिड १९ संकट व्यवस्थापन केन्द्रको बैठकले इनर्वा नाकाबाहेकका नाकाबाट आवतजावत रोक्ने निर्णय गरेपनि उक्त निर्णयको कार्यन्वयन भने भएको पाइदैन । पर्साको श्रीसिया, अलौ, भकुवा, अमरपटी, भिष्वा, जानकी टोला, आसवारी लगायतका नाकाहरुबाट बिना परीक्षण नै नेपाल प्रवेश गर्ने गरेको पाइएको छ ।

भारतीय सीमा क्षेत्रबाट निर्बाध रूपमा आवतजावत भइरहँदा अँझै संक्रमण फैलिने सम्भावना बढेको छ । मुख्यगरी वीरगञ्जको छपकैया नाका हुँदै आवतजावत गर्नेहरुको लर्काे देख्न सकिन्छ । सीमा सुरक्षा बलको अगाडीबाट आवतजावत गरेपनि सशस्त्र प्रहरी भने मुकदर्शक बनेको स्थानीयको आरोप छ ।

‘यसरी बिना स्वास्थ्य सावधानी भारतबाट आउँदा यहाँ हामी जोखिममा हुन्छौँ’ छपकैयाका स्थानीयको भनाई छ । भारतका विभिन्न शहरमा काम गरी नेपाल फर्किने क्रम अँझै रोकिएको छैन । खुल्ला सीमानाकाका कारण मुख्य नाकासँगै अन्य विभिन्न चोर बाटो भएर सर्वसाधारण नेपाल भित्रिने गरेका छन् ।यसरी चोरबाटो भएर भित्रिएकाहरु स्वास्थ्य परीक्षण नगराएरै परिवार तथा आफन्तकहाँ जाँदा संक्रमण फैलिने जोखिम झन बढेर गएको छ । YATRADAILY