वीरगञ्ज। वीरगञ्ज हेल्थ केयरले शनिवार साँझदेखि कोभिड अस्पताल सञ्चालनमा ल्याएको छ ।पर्सा जिल्लामा कोरोना संक्रमितको संख्या बढेर उपचार गर्ने अस्पताल तथा बेड अभावलाई मध्यनजर गर्दै सामाजिक उत्तरदायित्वस्वरुप २५ बेडको आइसियु र १० बेड भेन्टिलेटरसहितको अस्पताल सञ्चालन गरिएको  वीरगञ्ज हेल्थ केयरका सञ्चालक डा. अबुल हैस अन्सारीले जानकारी दिए ।

दैनिक रुपमा संक्रमितको संख्या बढ्दै जाँदा पनि स्थानीय सरकार, स्थानीय प्रशासन, प्रदेश सरकार कसैले पनि कोभिड अस्पतालको लागि पहल नगरेपछि बाध्य भएर आफै अस्पताल सञ्चालन गरिएको अन्सारीको भनाई छ ।

पहिलो चरणको कोरोना भाइरस संक्रमण फैलिँदा पनि वीरगञ्ज हेल्थ केयरले कोभिड संक्रमितको उपचार गरेको थियो । उक्त समयमा कोरोना संक्रमितको उपचार गर्दा १ करोड रुपैयाँ घाटा लागेको पनि अन्सारीले बताए ।

अहिले दैनिक २ देखी ४ पटकसम्म हेलिकप्टरमार्फत काठमाण्डौ रिफर गर्दा ३ देखि ६ लाखसम्म खर्च हुने गरेको बताउँदै सामान्य अवस्थाका गरीब परिवार रकमका अभावमा उपचार नपाएर मर्नुपर्ने अवस्थाको अन्त्यका लागि अहिले जेनरल वार्डलाई खाली गराएर उपचार गर्न थालिएको यात्राडेलीसँगको संवादमा अन्सारीले भने ।