वीरगञ्ज । जिल्ला प्रशासन कार्यालय पर्सालाई प्रदेश नम्बर २ सरकारले विभिन्न स्वास्थ्य सामाग्री सहयोग गरेको छ ।जिल्ला कोभिड १९ संकट व्यवस्थापन केन्द्रले आवश्यक स्वास्थ्य सामाग्रीको लागि प्रदेश सरकारसँग पहल गर्ने निर्णय गरे बमोजिम प्रदेश सरकारले मास्क, गलभ्स, फेससिल्ड लगायतका सामाग्री सहयोग गरेको हो ।

नयाँ भेरियन्टसहितको कोरोना भाइरसबाट आक्रान्त बनेको पर्सा जिल्लामा अग्रपंक्तिमा खटिएर काम गर्ने स्वास्थ्यकर्मी, सुरक्षाकर्मी, तथा कर्मचारीहरुलाई वितरण गर्नेगरी स्वास्थ्य सामाग्री सहयोग गरेको हो ।

प्रदेश सरकारको तर्फबाट मुख्यमन्त्री लालबाबु राउतका स्वकिय सचिब दिपक यादवले पर्साका प्रमुख जिल्ला अधिकारी पिताम्बर घिमिरेलाई ३ सय थान एन ९५ मास्क, १ हजार पिस गलभ्स, ५ हजार पिस मेडिकल फेस मास्क, २ सय २५ थान फेस सिल्ड, हाते पुस्तिका लगायतका सामाग्री हस्तान्तरण गरेका हुन् । कोभिड १९ को महामारीबाट सुरक्षित रहनका लागि अपनाउनुपर्ने सावधानीहरु तथा सचेतनाका लागि अपनाइने उपायको बारेमा लेखिएको हाते पुस्तिका सहयोग गरिएको हो ।

जिल्ला प्रहरी कार्यालय पर्साका प्रमुख प्रहरी उपरीक्षक बेलबहादुर पाण्डे तथा रेडियो वीरगञ्जका कार्यकारी अध्यक्ष ध्रुव साह लगायतको उपस्थिती स्वास्थ्य सामाग्री प्रदान गरिएको हो ।