वीरगञ्ज | वीरगञ्जको नारायणी अस्पतालमा थप तीन जना कोरोना संक्रमितको मृत्यु भएको छ।दुई महिला र एक पुरुष गरि थप ३ संक्रमितको उपचारको क्रममा मृत्यु भएको नारायणी अस्पतालका कोभिड संयोजक डाक्टर सरोज रोशन दासले जानकारी दिए ।वीरगञ्ज महानगरपालिका–३ निवासी ४७ वर्षकी महिलाको उपचारको क्रममा मृत्यु भएको हो।

गत मंगलबार उनी उपचारको लागि भर्ना भएकी थिइन्।यस्तै बाराको जीतपुर सिमरा उप महानगरपालिका–२४ निवासी ७७ वर्षका वृद्धको पनि उपचारको क्रममा मृत्यु भएको छ।त्यस्तै वीरगञ्ज महानगरपालिका–१६ नगवा निवासी ४८ वर्षकी महिलाको उपचारको क्रममा नारायणी अस्पतालमा मृत्यु भएको कोभिड संयोजक दासले बताए।यस्तै नारायणी अस्पतालमा गरिएको परीक्षणमा थप १ सय ७५ जनामा कोरोना संक्रमण पुष्टि भएको छ।

२ सय ८८ जनाको स्वाब परीक्षण गर्दा १ सय ७५ जनामा कोरोना पुष्टि भएको दासले जानकारी दिए ।संक्रमण देखिनेमा सबै भन्दा बढी पर्सा जिल्लाका १ सय ३१ जना रहेको उनले बताए।यस्तै बाराका ३४, सर्लाहीका ५, रौतहटका ३, महोत्तरी र दाङका एक–एक जनामा संक्रमण देखिएको दासले बताए।