वीरगञ्ज । कोरोना संक्रमणको उच्च जोखिममा रहेको पर्सामा एकैदिन ३ जना कोरोना संक्रमितको मृत्यु भएको छ । वीरगञ्जस्थित नारायणी अस्पतालमा उपचाररत २ जना र नारायणी वयोद्या अस्पतालमा उपचाररत १ जना गरी ३ जनाको मृत्यु भएको हो ।
सोमवार बिहान साढे ९ बजे वीरगञ्ज महानगरपालिका वडा नम्बर ६ आदर्शनगर निवासी ६० वर्षीय बृद्धको मृत्यु भएको हो । बैशाख २ गते पिसआर रिपोर्ट पोजेटिभ आएपछि ३ गते नारायणी अस्पतालमा भर्ना भएका बृद्ध थाइराइड, गम्भिर निमोनिया र हृदयघाटबाट पनि ग्रसित रहेको उपचारमा संलग्न चिकित्सकले बताएका छन् ।
यसैविच वीरगञ्ज महानगरपालिका वडा नम्बर ८ पानीट्यांकी निवासी ३८ वर्षीय महिलाको सोमवार बेलुका पौने ६ बजे मृत्यु भएको छ । बैशाख १० गते गरिएको पिसिआर परिक्षणमा उनको रिपोर्ट पोजेटिभ देखिएको थियो ।
स्वास्थ्यमा समस्या देखिएपछि सोमवार दिउँसो नारायणी वयोद्या अस्पताल गण्डकमा उनलाई भर्ना गरिएको पारिवारीक स्रोतले जनाएको छ । निमोनियाबाट समेत पिडित ति महिलाको श्वासप्रश्वासमा पनि समस्या आएपछि उपचारको क्रममा सोमवार बेलुका मृत्यु भएको नारायणी वयोद्या अस्पतालका प्रशासन प्रमुख शत्रुधन प्रसाद कुर्मी उर्फ विष्णु पटेलले जानकारी दिए ।
त्यस्तै पर्साको बहुदरामाई नगरपालिका वडा नम्बर ७ निवासी ४५ वर्षीय महिलाको पनि मृत्यु भएको छ । स्वास्थ्यमा समस्या आएपछि बैशाख १२ गते नारायणी अस्पतालमा भर्ना भएकी ति महिलाको बैशाख १३ गते एन्टिजेन परीक्षणमा पोजेटिभ रिपोर्ट आएको थियो ।
गम्भिर किसिमको निमोनियाबाट समेत पिडित महिलाको सोमवार बेलुका ६ बजे मृत्यु भएको नारायणी अस्पतालका कोभिड संयोजक डा. सरोजरोशन दासले जानकारी दिए । yatradaily
