वीरगञ्ज । पर्सामा लगातार रुपमा कोरोना संक्रमितको संख्या बढ्दै गएपछि संक्रमितको उपचार हुने वीरगञ्जको नारायणी अस्पतालमा बेडभन्दा बढी कोरोनाका बिरामीहरुको उपचार भइरहेको छ।

अस्पतालको आकस्मिक विभामामा रहेका बेडमा अहिले कुनैमा दुई, कुनैमा तीन जना विरामीलाई राखेर उपचार गर्नुपरेको अस्पतालका डा. निरज सिंहले बताए।

अस्पतालमा बेडको अभावका कारण आकस्मिक कक्षमै कोभिड र ननकोभिडका बिरामीहरुलाई सँगै राखेर उपचार गर्नुपर्ने अवस्था रहेको डा. सिंह बताउँछन्।

बेडको अभावमा कोभिड र ननकोभिडका बिरामीलाई पनि सँगै राखेर उपचार गर्न बाध्य भएको अस्पतालका इमर्जेन्सी विभागका इञ्चार्ज डाक्टर उदय नारायण सिंहले बताए।

उनले सोमबार बिहान अचानक संक्रमितहरु भर्ना हुने क्रम बढेको तथा लक्षण भएकालाई पनि इमर्जेन्सी वार्डमै राखेर टेष्टपछि मात्रै छुटयाइने भएकाले यस्तो समस्या आएको बताए।

‘आकस्मिक कक्षमा रहेका बेड अचानक आज बिहान शत प्रतिशत कोभिड र कोभिडका शंकास्पद बिरामीहरुले भरिएको अवस्था थियो,’ उनले भने, ‘एउटा बेडमा दुई जना,  तीनजना राख्ने भयावह स्थिति थियो।’

विहान अचानक कोभिडका बिरामीहरुको संख्या बढेपछि अहिले साँझसम्म छुट्टै आइसोलेशन वार्ड बनाइएको सिंहको भनाइ छ।  अहिले बढिरहेको कोरोना संक्रमितहरुको संख्याले नारायणी अस्पतालले मात्रै थेग्न नसक्ने डाक्टर सिंहको भनाइ छ।

अहिले पनि समुदायमा जाँच नगरेका थुप्रै कोभिडका बिरामीहरु हुनसक्ने उनले बताए। लकडाउन गर्न ढिलो भइसकेको उनको भनाइ छ।

‘निषेधाज्ञा, लकडाउन गर्न धेरै ढिला भइसक्यो। संक्रमण समुदायमा फैलिएर धेरैको ज्यान नै गएपछि त्यस्तो निषेधाज्ञा र लकडाउनको कुनै अर्थ रहँदैन,’ उनले भने।

अहिले फैलिएको कोरोनाको चेन ब्रेक गर्न पर्याप्त जनशक्ति, पर्याप्त बेडको व्यवस्था गरेर कमसेकम मानिसको मृत्यु नहोस् भन्नेतर्फ केन्द्रीत हुनुपर्ने डाक्टर सिंहको सुझाव छ।

नारायणी अस्पतालमा अहिले ४९ जना कोरोना संक्रमितहरुको उपचार भइरहेको अस्पतालका कोभिड संयोजक डा.सरोज रोशन दासले जानकारी दिए।

उनीहरु सबैजनालाई अक्सिजन दिएर राखिएको उनले बताए। अन्य संक्रमितहरु जसमा समान्य लक्षण देखिएका छन् तथा लक्षण नभएका व्यक्तिहरुलाई होम आइसोलेशनमै पठाउने गरिएको दासले बताए।यो समाचार देश सन्चारको लागि राम मण्डलले लेखनु भएको छ ।