वीरगंज | वीरगंजमा थप दुई जना कोरोना संक्रमितको मृत्यु भएको छ। मृत्यु हुनेमा वीरगंज-१६ बस्ने ६१ वर्षीया महिला र वीरगंज-१९ बस्ने ६३ वर्षीय पुरुष रहेका छन्।वीरगंजको विर्तामा रहेको त्रिवि अन्तर्गतको नर्सिङ क्याम्पसमा काम गर्ने कर्मचारी समेत रहेकी महिलाको मृत्यु नारायणी अस्पतालमा बिहीवार बिहान भएको नारायणी अस्पताल कोभिड संयोजक डा सरोज रोशन दासले बताए। बैशाख ३ गते कोरोना संक्रमण पुष्टि भई बैशाख ५ गते अस्पताल भर्ना भएकी उनमा श्वासप्रश्वास सम्बन्धी समस्या देखिएको थियो।

त्यसैगरी, बिहीवार बिहान वीरगंज-१९ बस्ने ६३ वर्षीय पुरुषको नारायणी अस्पतालमा उपचारको क्रममा मृत्यु भएको छ। श्वासप्रश्वासमा समस्या भएर बैशाख ५ गते नारायणी अस्पतालमा भर्ना भएका ती वृद्धमा बैशाख ६ गते कोरोना संक्रमण पुष्टि भएको थियो।योसँगै चैत ३१ देखि अहिलेसम्म पर्साका ६, बाराका १ र सर्लाहीका १ गरी १० दिनमा ८ जनाको मृत्यु भइसकेको छ। ८ जनामध्ये पर्साको वीरगंजस्थित नारायणी अस्पतालमा ६ जनाको, नारायणी वयोधामा १ जना र चितवनमा १ जनाको निधन भएको हो।

यसैबीच, वीरगंजमा थप ७८ जना संक्रमित थपिएका छन्। नारायणी अस्पतालमा बिहीवार भएको १३८ जनाको स्वाब परीक्षणमा ५२ पुरुष र २६ महिलासहित ७८ जनामा कोरोना पुष्टि भएको नारायणी अस्पतालका कोभिड संयोजक डा दासले बताए।७८ जनामध्ये ५७ जना पर्साका, १८ जना बाराका, २ जना सर्लाहीका र १ जना धनुषाका रहेका छन्।