वीरगंज | प्रदेश–२, मा रहेको नेशनल मेडिकल कलेजमा पहिलोपटक मुटुको दुईवटा भल्भको शल्यक्रिया गरिएको छ।वीरगञ्ज रानिघाटका ४८ वर्षीय पुरुष सुलमान हवारीको मुटुको ‘डबल भल्भ रिप्लेसमेन्ट’ गरिएको राष्ट्रिय मुटु तथा फोक्सो समाजका राष्ट्रिय संयोजक रामचन्द्र खत्रीले बताए।

हवारीको चैत २८ गते शल्यक्रिया गरिएको खत्रीले बताए।  उनका अनुसार यसरी मुटुको दुईवटा भल्भ शल्यक्रिया गरिनु जटिल खालको ‘केस’ हो। हवारी शल्यक्रियासहितको स्वास्थ्य उपचारको सम्पूर्ण खर्च राष्ट्रिय मुटु तथा फोक्सो समाजको पहलमा चेक हर्ट फाउण्डेसनले गरेको  खत्रीको भनाइ छ।

राष्ट्रिय मुटु तथा फोक्सो समाजका महासचिव एवं वरिष्ठ मुटु, फोक्सो तथा रक्तनली शल्यचिकित्सक डा कौशल किशोर तिवारीको नेतृत्वमा नेशनल मेडिकल कलेज विरगञ्जका वरिष्ठ मुटु, फोक्सो तथा रक्तनली शल्यचिकित्सक डा अफ्रोज अन्सारी, कार्डियाक एनेस्थेसिलोजिष्ट डा विश्वास प्रधान, कार्डियाक पफ्र्युजेनिष्ट रविन्द्र शाह, नर्स आशा कुमारी र सञ्जु पाण्डे लगायतले हवारीको मुटुको शल्यक्रिया तथा उपचार गरेका थिए।

केही वर्षदेखि नै मुटुको बिरामी ती पुरुषलाई औषधिले पनि ठीक नभएपछि मुटुको दुईवटा भल्भ फेरिएको हो। अप्रेशनपछि उनको मुटुको चारवटै भल्भले राम्रो काम गरेको चिकित्सकले बताएका छन्। शल्यक्रियापश्चात् स्वास्थ्य अवस्था सामान्य भएपछि उनलाई वैशाख ६ गते डिस्चार्ज गरिएको छ।